អ៊ុយក្រែន៖ ប្រធានាធិបតីអ៊ុយក្រែនលោក Volodymyr Zelenskyy បានបញ្ចេញសុន្ទរកថាជាវីដេអូផ្ញើជូនជនរួមជាតិកាលពីល្ងាចថ្ងៃពុធ ដោយជំរុញឲ្យពលរដ្ឋអ៊ុយក្រែនកុំឲ្យភ័យស្លន់ស្លោទាក់ទងនឹងរបាយការណ៍ថា អាចនឹងមានការចូលឈ្លានពានពីសំណាក់ប្រទេសរុស្ស៊ី។ លោក Zelenskyy បានអំពាវនាវសុំឲ្យពលរដ្ឋអ៊ុយក្រែនកុំភិតភ័យ និងរក្សាភាពស្ងៀមស្ងាត់។
លោកក៏បានធានាអះអាងផងដែរថា ប្រទេសនេះបានត្រៀមខ្លួនរួចរាល់សម្រាប់រឿងហេតុគ្រប់យ៉ាងហើយ ប៉ុន្តែរដ្ឋបាលរបស់លោកកំពុងធ្វើកិច្ចការគ្រប់បែបយ៉ាង ដើម្បីដោះស្រាយបញ្ហាតាមផ្លូវការទូត និងនាំសន្តិភាពចូលក្នុងប្រទេសអ៊ុយក្រែន។ លោកថា អ៊ុយក្រែនមិនចង់បានសង្គ្រាមទេ ប៉ុន្តែប្រទេសនេះតែងតែត្រៀមខ្លួនជានិច្ច ចំពោះសង្គ្រាមដែលអាចកើតឡើងនៅថ្ងៃណាមួយ។ ខណៈដែលការចរចាដ៏សំខាន់ជិតចូលមកដល់រវាងប្រមុខការទូតសហរដ្ឋអាមេរិក និងសមភាគីរុស្ស៊ី។ សហរដ្ឋអាមេរិក និងរុស្ស៊ីកាលពីថ្ងៃអាទិត្យពុំបានបង្ហាញសញ្ញាថា នឹងមានការផ្លាស់ប្ដូរជំហរលើបញ្ហាអ៊ុយក្រែនទេ ដែលនាំឲ្យមានក្ដីបារម្ភថា រុស្ស៊ីអាចនឹងចូលឈ្លានពាន និងបង្កសង្គ្រាមថ្មីនៅក្នុងតំបន់អឺរ៉ុប។
ថ្លែងក្នុងទីក្រុងគៀវ ប្រមុខការទូតអាមេរិកលោក Antony Blinken បានចោទប្រកាន់រុស្ស៊ីពីបទរៀបចំផែនការបង្កើនកម្លាំងទ័ពជាង ១០ម៉ឺននាក់ដែលបានដាក់ពង្រាយនៅតាមព្រំដែនអ៊ុយក្រែន និងលើកឡើងថា ចំនួនកងទ័ពអាចនឹងកើនឡើងទ្វេដងតាមបទបញ្ជាភ្លាមៗ។ លោក Blinken ពុំបានបញ្ជាក់ឲ្យបានច្បាស់លាស់ទេ ប៉ុន្តែលោកថា រុស្ស៊ីបានបញ្ជូនចំនួនកងទ័ពមិនជាក់លាក់ពីប្រទេសបេឡារុស្ស ជាសម្ព័ន្ធមិត្តរបស់ខ្លួនដែលមានព្រំដែនជាប់ជាមួយអ៊ុយក្រែនផងដែរ សម្រាប់ល្បែងសង្គ្រាមដ៏ធំនៅខែក្រោយ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
