ប្រមុខការពារជាតិរបស់ហ្វីលីពីន និងអូស្ត្រាលី នាថ្ងៃសុក្រ (ទី២២ ខែសីហា) នេះ បានប្រាប់ឲ្យដឹងថា ប្រទេសទាំង២ គ្រោងនឹងចុះហត្ថលេខាលើកិច្ចព្រមព្រៀងថ្មីមួយ ដើម្បីអភិវឌ្ឍហេដ្ឋារចនាសម្ព័ន្ធយោធារបស់ប្រទេសអាស៊ីអាគ្នេយ៍ ខណៈភាគីទាំង២ កំពុងស្វែងរកការប្រឆាំងនឹង «សកម្មភាពជាឯកតោភាគី» របស់ចិន នៅក្នុងតំបន់។

ផែនការនេះត្រូវបានប្រកាសនៅពេលដែលអូស្ត្រាលី និងហ្វីលីពីន បានធ្វើសមយុទ្ធយោធារួមគ្នា ដែលរួមមានទាំងសមយុទ្ធបាញ់គ្រាប់ពិត និងចូលរួមពាក់ព័ន្ធពីបុគ្គលិកប្រហែល ៣.៦០០នាក់ នៅភាគខាងលិច និងភាគខាងជើងប្រទេសហ្វីលីពីន។

គួរជ្រាបថា ទីក្រុងប៉េកាំង និងម៉ានីលមានការប្រឈមដាក់គ្នាជាបន្តបន្ទាប់ ក្នុងតំបន់មានជម្លោះ នៅសមុទ្រចិនខាងត្បូង ជាផ្លូវទឹកដ៏សំខាន់ដែលប្រទេសចិនអះអាងសិទ្ធិស្ទើរតែទាំងស្រុង ទោះបីជាមានសេចក្តីសម្រេចអន្តរជាតិថា ការទាមទាររបស់ខ្លួនមិនមានមូលដ្ឋានផ្លូវច្បាប់ក៏ដោយ។

បន្ទាប់ពីបានជួបជាមួយសមភាគីហ្វីលីពីន នៅទីក្រុងម៉ានីល រដ្ឋមន្ត្រីការពារជាតិអូស្ត្រាលី Richard Marles បានប្រាប់អ្នកសារព័ត៌មានថា៖ «ប្រទេសយើងទាំង២ ទទួលស្គាល់ និងកំពុងជួបប្រទះសម្ពាធដែលសណ្ដាប់ធ្នាប់ផ្អែកលើច្បាប់ កំពុងប្រឈមនឹងបញ្ហា នៅទីនេះ នៅក្នុងតំបន់ឥណ្ឌូ-ប៉ាស៊ីហ្វិក»។

ហ្វីលីពីន ដែលជាសម្ព័ន្ធមិត្តសន្ធិសញ្ញារបស់សហរដ្ឋអាមេរិក បាននិងកំពុងពង្រឹងបណ្តាញសម្ព័ន្ធភាពរបស់ខ្លួន ជាមួយនឹងប្រទេសដែលមានគំនិតដូចគ្នា ដើម្បីប្រឆាំងនឹងឥទ្ធិពលដែលកំពុងកើនឡើងរបស់ចិន នៅក្នុងតំបន់អាស៊ី-ប៉ាស៊ីហ្វិក។

ប្រមុខការពារជាតិហ្វីលីពីន លោក Gilberto Teodoro បាននិយាយថា៖ «អ្វីដែលយើងមិនអាចគ្រប់គ្រងបាន គឺសកម្មភាពឯកតោភាគីរបស់ចិន។ ដូច្នេះហើយ តម្រូវឲ្យមានវិធានការចាំបាច់ ដើម្បីទប់ស្កាត់សកម្មភាពទាំងនោះ និងផ្តល់សារដ៏រឹងមាំថា សកម្មភាពរបស់ពួកគេ នឹងមិនត្រូវបានអត់ឱនដោយអន្តរជាតិ (សហគមន៍) ឡើយ»៕