រដ្ឋមន្ត្រីការបរទេសរុស្ស៊ី លោក Sergey Lavrov បាននិយាយថា អ៊ុយក្រែន និងរុស្ស៊ី មិនទាន់ទៅកាន់តែកៀកនឹងការរៀបចំកិច្ចប្រជុំកម្រិតខ្ពស់បំផុតនៅឡើយទេ ហើយជំនួបកំពូល រវាងប្រធានាធិបតីអ៊ុយក្រែន លោក Volodymyr Zelenskyy និងមេដឹកនាំរុស្ស៊ី លោក Vladimir Putin គឺអាចធ្វើទៅបាន លុះត្រាតែភាគីទាំង២ យល់ព្រមលើរបៀបវារៈជាមុនសិន។

លោក Lavrov បានលើកឡើងថា ជំនួប រវាងលោក Putin និងលោក Zelenskyy មិនត្រូវបានគ្រោងទុកនោះទេ ប៉ុន្តែប្រធានាធិបតីរុស្ស៊ី ត្រូវបានគេរាយការណ៍ថា បានត្រៀមខ្លួនជាស្រេច ដើម្បីមានជំនួបនេះ នៅពេលដែលរបៀបវារៈ សម្រាប់កិច្ចប្រជុំកំពូល ត្រូវបានរៀបចំឡើង។ ហើយលោក Lavrov បានសង្កត់ធ្ងន់ថា៖ «សម្រាប់ពេលនេះ មិនទាន់មានរបៀបវារៈនៅឡើយទេ»។

ក្នុងពេលជាមួយគ្នានេះ បើតាមលោករដ្ឋមន្ត្រីការបរទេសរូបនេះ បានឲ្យដឹងទៀតថា រុស្ស៊ីបានយល់ព្រមបង្ហាញនូវភាពបត់បែនលើបញ្ហាមួយចំនួន ដែលត្រូវបានលើកឡើងដោយប្រធានាធិបតីអាមេរិក លោក Donald Trump ក្នុងអំឡុងពេលមានកិច្ចចរចា នៅរដ្ឋ Alaska។

បន្ទាប់ពីកិច្ចពិភាក្សាជិត ៣ម៉ោង រវាងលោក Trump និងលោក Putin នៅរដ្ឋ Alaska កាលពីថ្ងៃទី១៥ ខែសីហា ការយកចិត្តទុកដាក់របស់អន្តរជាតិ បានបង្វែរទៅទីក្រុងវ៉ាស៊ីនតោន ជាកន្លែងដែលនៅថ្ងៃទី១៨ ខែសីហា ប្រធានាធិបតីអាមេរិក បានជួបពិភាក្សាជាមួយសមភាគីអ៊ុយក្រែន។

មេដឹកនាំអឺរ៉ុបក៏បានចូលរួមការពិភាក្សាផងដែរ ដោយពិភាក្សាអំពីបញ្ហាជាច្រើន ក្នុងនោះរួមទាំងការធានាសន្តិសុខ សម្រាប់អ៊ុយក្រែនផងដែរ។ ជាលទ្ធផលនៃការពិគ្រោះយោបល់ទាំងនេះ ភាគីអាមេរិក បានស្នើឲ្យមានកិច្ចប្រជុំត្រីភាគី ដែលមានសហរដ្ឋអាមេរិក អ៊ុយក្រែន និងរុស្ស៊ី៕