អង្គការឃ្លាំមើលភាពអត់ឃ្លានសកលគាំទ្រដោយអង្គការសហប្រជាជាតិបាននិយាយថា ទីក្រុងហ្កាហ្សា និងតំបន់ជុំវិញនោះ កំពុងទទួលរងនូវគ្រោះទុរ្ភិក្សជាផ្លូវការ ហើយវាទំនងជានឹងរាលដាលពាសពេញតំបន់ហ៊ុមព័ទ្ធនោះ។

កាលពីថ្ងៃសុក្រ ប្រព័ន្ធចំណាត់ថ្នាក់ដំណាក់កាលសន្តិសុខស្បៀងរួមបញ្ចូលគ្នា(IPC) បាននិយាយថា មនុស្សចំនួន៥១៤.០០០នាក់ ជិតមួយភាគបួននៃពលរដ្ឋប៉ាឡេស្ទីននៅតំបន់ហ្កាហ្សា កំពុងជួបប្រទះទុរ្ភិក្ស ដោយចំនួននេះកើនឡើងដល់៦៤១.០០០នាក់នៅចុងខែកញ្ញា។

បញ្ហានេះកើតឡើងបន្ទាប់ពីសង្រ្គាមរយៈពេល២២ខែ ក្នុងអំឡុងពេលដែលកងកម្លាំងអ៊ីស្រាអែល បានបំផ្លាញហេដ្ឋារចនាសម្ព័ន្ធ និងហាងនំប៉័ង ដែលបានរារាំងមិនឲ្យជំនួយចូលទៅក្នុងតំបន់ហ្កាហ្សាស្ទ្រីប ហើយបានកំណត់គោលដៅនិងសម្លាប់ពលរដ្ឋប៉ាឡេស្ទីនដែលអស់សង្ឃឹមក្នុងការស្វែងរកស្បៀងអាហារ។ នេះជាលើកទីមួយហើយដែលប្រព័ន្ធចំណាត់ថ្នាក់ដំណាក់កាលសន្តិសុខស្បៀងរួមបញ្ចូលគ្នា(IPC) បានកត់ត្រាពីទុរ្ភិក្សនៅខាងក្រៅទ្វីបអាហ្រ្វិក ហើយក្រុមសកលបានព្យាករណ៍ថាស្ថានភាពទុរ្ភិក្សនឹងរាលដាលដល់តំបន់ភាគកណ្តាល និងភាគខាងត្បូងនៃទីក្រុង Deir el-Balah និងទីក្រុង Khan Younis នៅចុងខែក្រោយ។ នេះជារបៀបដែលមេដឹកនាំពិភពលោក និងអង្គការក្រៅរដ្ឋាភិបាលកំពុងមានប្រតិកម្មចំពោះរបាយការណ៍របស់ប្រព័ន្ធចំណាត់ថ្នាក់ដំណាក់កាលសន្តិសុខស្បៀងរួមបញ្ចូលគ្នា(IPC) ដែលអគ្គលេខាធិការអង្គការសហប្រជាជាតិលោក Antonio Guterres បាននិយាយថាទុរ្ភិក្សនៅតំបន់ហ្កាហ្សាគឺជា «មហន្តរាយដែលបង្កើតឡើងដោយមនុស្ស»។

លោក Guterres បាននិយាយថា «ទុរ្ភិក្សពុំមែនត្រឹមតែអាហារប៉ុណ្ណោះទេ វាគឺជាការធ្វើឲ្យដួលរលំដោយចេតនានៃប្រព័ន្ធដែលត្រូវការសម្រាប់ការរស់រានមានជីវិតរបស់មនុស្ស»។ «មនុស្សជាច្រើនកំពុងអត់ឃ្លាន កុមារស្លាប់ជាបន្តបន្ទាប់ ហើយអ្នកដែលមានកាតព្វកិច្ចត្រូវធ្វើ កំពុងបរាជ័យ»។