ការធ្វើកូដកម្មដោយក្រុមអ្នកត្រួតពិនិត្យចរាចរណ៍ផ្លូវអាកាស បានធ្វើឲ្យជើងហោះហើរត្រូវចតចោល និងបណ្តាលឱ្យមានការពន្យារពេលនៅអាកាសយានដ្ឋាននៅទូទាំងប្រទេសអាហ្សង់ទីន ធ្វើឲ្យអ្នកដំណើររាប់រយនាក់ជាប់គាំង និងស្វែងរកជម្រើសកក់សំបុត្រឡើងវិញកាលពីថ្ងៃសុក្រ។ 

នៅអាកាសយានដ្ឋាន Jorge Newbery ក្នុងទីក្រុង Buenos Aires អេក្រង់ទូរទស្សន៍បង្ហាញជើងហោះហើរជាច្រើនវ៉ុលត្រូវបានលុបចោល ខណៈអ្នកធ្វើដំណើរតម្រង់ជួរនៅការិយាល័យលក់សំបុត្រយន្តហោះ និងនៅបញ្ជរសេវាបម្រើអតិថិជន។

លោក Marcelo Chavez អនុប្រធាននៃសមាគមបច្ចេកទេសនិងនិយោជិតនៃកិច្ចការពារនិងសុវត្ថិភាពសម្រាប់ចរាចរណ៍ផ្លូវអាកាសបាននិយាយថា «សហជីព និងបុគ្គលិករំពឹងថានឹងត្រូវបានគេស្តាប់ និងមានសិទ្ធិចរចា»។ លោកបានលើកឡើងពីការព្រួយបារម្ភទាំងប្រាក់ឈ្នួល និងសុវត្ថិភាពប្រតិបត្តិការ ដោយអះអាងថា ផ្នែកប្រព័ន្ធចររាចរណ៍ផ្លូវអាកាសកំពុងត្រូវបានគេ «កាត់ប្រាក់»។

កូដកម្ម បានធ្វើឲ្យរាំងស្ទះការចេញដំណើរជើងហោះហើរ និងការចុះចតរបស់យន្តហោះ ព្រមទាំងការបញ្ជូន ឬទទួលផែនការជើងហោះហើរ។ សហជីពកំពុងទាមទារដំឡើងប្រាក់ខែ បន្ទាប់ពីបានបដិសេធការផ្តល់ឲ្យរបស់រដ្ឋាភិបាលក្នុងការដំឡើងប្រាក់ខែប្រមាណត្រឹមតែ១%។ ក្រសួងដឹកជញ្ជូនបញ្ជាក់ថា ការចរចាប្រាក់ខែជាមួយសហជីព នៅតែបន្ត។