​បាល់ទាត់៖ ​ក្រុម​បិសាច​ក្រហម Manchester United បាន​រង​នឹង​ការ​សម្រុក​ពី​ក្រុម​ម្ចាស់ផ្ទះ Brentford ខ្លាំង​មុនពេល​ដែល​អាច​រកបាន​គ្រាប់​បាល់​ជ័យ​ជំនះបាន​ក្នុងការ​ប្រកួត​សប្តាហ៍​ទី២១ របស់ខ្លួន​នៅ​ក្របខណ្ឌ English Premier League​។​ ​​David de Gea ជានិច្ចកាល​ជួយសង្គ្រោះ​បាល់​បានជា​ច្រើនលើក​ពី​ឱកាស​សម្រុក​របស់ Brentford នៅ​វគ្គ​ទី១​។

​​លុះ​ឈានចូល​វគ្គ​ទី២ ទើប​ក្រុម​របស់លោក Ralf Rangnick អាច​បំបែក​ស្ថានភាព​តានតឹង​បាន​តាមរយៈ​គ្រាប់​បាល់​នាំមុខ​របស់ Anthony Elanga នៅ​នាទី​ទី៥៥ មុនពេល​ដែល Bruno Fernandes មិន​កំណាញ់​បាល់​ប៉ះ​បញ្ជូន​ឱ្យ Mason Greenwood បង្កើន​ការនាំ​មុខ ២-០ នៅ​នាទី​ទី៦២​។ ​​ខ្សែប្រយុទ្ធ​អង់គ្លេស Marcus Rashford គឺជា​អ្នកសំរេច​គ្រាប់​ចុងក្រោយ​នៅ​នាទី​ទី៧៧ មុន​ពេលដែល​ម្ចាស់ផ្ទះ​តប​បាន​មួយ​គ្រាប់​វិញ​នៅ​នាទី​ទី៨៥ ដោយ Ivan Toney​។​ ​​ជ័យជំនះ​នេះ Manchester United បន្ត​ឈរ​លេខ ៧ មាន ៣៥ពិន្ទុ​ស្មើ​ជាមួយ​ក្រុម​លេខ ៦ Arsenal ខណៈ Brentford ឈរ​លេខ ១៤ មាន ២៣ពិន្ទុ​។ ​​ចំណែក​មួយ​ប្រកួត​ទៀត​យប់មិញ​ដែរ Spurs បាន​យកឈ្នះ​នៅ​ទឹកដី Leicester City ៣-២ តាមរយៈ​ ២​គ្រាប់​ចុង​ម៉ោង​មិន​គួរឱ្យ​ជឿ​ពី​កីឡាករ​បម្រុង​ផ្លាស់ប្តូរ​ចូល Steven Bergwijn​។

​​ក្រុម​ម្ចាស់ផ្ទះ​បើក​ការនាំ​មុខមុន​ដោយ Patson Daka មុនពេល​ដែល Harry Kane តាម​ស្មើ​នៅ​នាទី​ទី៣៨​។ ​​Leicester ក៏​រកបាន​គ្រាប់​នាំមុខ​សាជាថ្មី​នៅ​នាទី​ទី៧៦ ដែល​គួរតែ​គ្រាប់​បាល់​ជ័យជំនះ​ទៅហើយ​ ខណៈ​ការប្រកួតឈានដល់​នាទី​ទី៩០+ ទៅហើយ​មិនមាន​ការ​ប្រែ​ប្រែល​គ្រាប់​បាល់​។ ​​ផ្ទុយទៅវិញ​កីឡាករ​ហូ​ឡង់ Steven Bergwijn ដែល​ដូរ​ចូល​ជំនួស Sergio Reguilon នៅ​នាទី​ទី៧៩ នោះ​គឺជាវិរៈ​បុរស​ក្នុងការ​ប្រកួត​នេះ​ដោយ​ស៊ុត​បញ្ចូល​ទី​ ២​គ្រាប់​នៅ​នាទី​ទី៩០+៥ និង ៩០+៧​។ ​​ជ័យជំនះ​នេះ​ធ្វើឱ្យ​ក្រុម​របស់លោក Antonio Conte ឡើងដល់​លេខ ៥ ក្នុង​តារាង​មាន ៣៦ពិន្ទុ​ដេញ​ពីក្រោយ West Ham ១ពិន្ទុ ​ខណៈ Leicester City ឈរ​លេខ ១០ មាន ២៥ពិន្ទុ​៕

​អត្ថបទ​៖​នាង សុភា​វុ​ធ