ការិយាល័យថវិកាសភា CBO បានប៉ាន់ប្រមាណកាលពីថ្ងៃសុក្រ (២២ សីហា) ថា ការដំឡើងពន្ធរបស់លោកប្រធានាធិបតី Donald Trump លើការនាំចូលរបស់សហរដ្ឋអាមេរិក ពីបរទេស អាចកាត់បន្ថយឱនភាពជាតិបានចំនួន ៤សែនកោដិដុល្លារ ក្នុងរយៈពេលមួយទសវត្សរ៍ក្រោយ។

ស្ថាប័ន CBO ដែលជាក្រុមវិភាគមិនប្រកាន់បក្សរបស់សភាអាមេរិក បាននិយាយថា ប្រសិនបើការដំឡើងពន្ធសកលរបស់លោក Trump នៅតែបន្តទៅមុខទៀត នោះការកើនឡើងនៃប្រាក់ចំណូលអាចកាត់បន្ថយឱនភាពបឋមចំនួន ៣,៣សែនកោដិដុល្លារ និងកាត់បន្ថយការចំណាយលើការប្រាក់សហព័ន្ធចំនួន ០,៧សែនកោដិដុល្លារ ក្នុងរយៈពេលមួយទសវត្សរ៍ខាងមុខ។

អត្រាពន្ធខ្ពស់ៗនាបច្ចុប្បន្នរបស់អាមេរិក ប្រហែលមិននៅបានយូរទេ ដោយសារតែការចរចាជាមួយដៃគូពាណិជ្ជកម្ម និងបញ្ហាផ្លូវច្បាប់អន្តរជាតិកំពុងបន្ត។ ទោះយ៉ាងនេះក្ដី ចំណូលពន្ធបន្ថែមនៅពេលនេះ អាចជួយទូទាត់កំណើនឱនភាព ដែលបង្កឡើងដោយច្បាប់កាត់ពន្ធ និងការចំណាយដ៏ខ្ពស់របស់បក្សសាធារណរដ្ឋ ដែលបានអនុម័តនៅឆ្នាំនេះ។ ទីភ្នាក់ងារ CBO បានប៉ាន់ប្រមាណថា ចំណុចនេះនឹងពង្រីកឱនភាពចំនួន ៣,៤សែនកោដិដុល្លារ វិញក្នុងរយៈពេលមួយទសវត្សរ៍ក្រោយ។

យោងតាមក្រសួងរតនាគារបានឱ្យដឹងថា បំណុលសហព័ន្ធរបស់អាមេរិក មានចំនួន ៣៧,១៨សែនកោដិដុល្លារ។ បំណុលនេះបានបន្តរីកធំឡើងក្រោមរដ្ឋបាលរបស់បក្សសាធារណរដ្ឋ និងប្រជាធិបតេយ្យ ខណៈសភាអាមេរិក បន្តអនុញ្ញាតឱ្យរដ្ឋាភិបាលសហព័ន្ធ ធ្វើការចំណាយច្រើនជាងចំណូល៕