ប្រព័ន្ធផ្សព្វផ្សាយក្នុងស្រុករាយការណ៍ថា ព័រទុយហ្គាល់ ស៊ូទ្រាំនឹងរលកកម្ដៅដ៏មហន្តរាយ ដែលធ្វើឱ្យមនុស្សស្លាប់យ៉ាងតិច ១.៣៣១នាក់ រហូតមកទល់ពេលនេះនៃឆ្នាំ២០២៥ និងបំផ្លិចបំផ្លាញដល់ប្រជាសាស្រ្តដែលមានវ័យចំណាស់របស់ប្រទេសនេះ។ កម្ដៅដ៏ខ្លាំងក្លាបានបង្កើនចំនួនអ្នកស្លាប់ទូទាំងប្រទេស ជាមួយនឹងកម្រិតដ៏លើសលប់ ហើយគ្រោះថ្នាក់បំផុតចំពោះអ្នកស្រុកវ័យ ៧៥ឆ្នាំឡើងទៅ។

អាជ្ញាធរសុខាភិបាលជាតិរបស់ព័រទុយហ្គាល់ បានសន្មត់ជាផ្លូវការថា ចំនួនអ្នកស្លាប់ដ៏ច្រើននេះទាក់ទងនឹងសីតុណ្ហភាពកើនឡើងជាប់លាប់អំឡុងចុងខែកក្កដា និងដើមខែសីហា ដែលបង្កភាពធ្ងន់ធ្ងរឡើងដល់ជំងឺរ៉ាំរ៉ៃដែលមានពីមុន ពោលគឺដូចជាសរសៃឈាមបេះដូង និងផ្លូវដង្ហើមជាដើម ដែលគ្របដណ្តប់នៅក្នុងក្រុមមនុស្សងាយរងគ្រោះបំផុតរបស់ប្រទេសនេះ។

អត្រាមរណៈភាគច្រើនត្រូវបានប្រកាសនៅទូទាំងភាគខាងជើង កណ្តាល និងភាគខាងត្បូងនៃតំបន់ Alentejo។ អាជ្ញាធរនិយាយថា សីតុណ្ហភាពកើនឡើងមិនគ្រាន់តែក្ដៅខ្លាំងភ្លាមៗប៉ុណ្ណោះទេ ប៉ុន្តែក៏បានពង្រីកចន្លោះពេលជាបន្តបន្ទាប់ផងដែរ ខណៈការឡើងកម្ដៅជាប់លាប់នេះត្រូវបានពង្រីកក្នុងអំឡុងចុងខែកក្កដា និងដើមខែសីហា ដែលធ្វើឱ្យប៉ះពាល់ដល់សុខភាពបន្ថែមទៀត។

ទិន្នន័យពីវិទ្យាស្ថានអាកាសធាតុព័រទុយហ្គាល់ (IPMA) បានបញ្ជាក់ថា ខែកក្កដា ឆ្នាំ២០២៥ ជាប់ជាខែកក្កដាក្តៅបំផុតទី៩ របស់ប្រទេស ចាប់តាំងពីកំណត់ត្រាចាប់ផ្តើមនៅឆ្នាំ១៩៣១មក ហើយសីតុណ្ហភាពខ្យល់ប្រចាំថ្ងៃជាមធ្យមក្នុងខែនោះ ឡើងលើសពីកម្រិតធម្មតា ៣អង្សាសេ យ៉ាងគ្រោះថ្នាក់៕