​រុស្ស៊ី៖ លោក​ប្រធានាធិបតី​រុស្ស៊ី Vladimir Putin បាន​ជួប​ជាមួយ​មេដឹកនាំ​អ៊ីរ៉ង់​លោក Ebrahim Raisi នៅ​វិមាន​ក្រឹម​ឡាំង ស្រប​ពេល​ដែល​ប្រទេស​ទាំង​២ មាន​អរិភាព​ជាមួយ​ទីក្រុង Washington​។ ​លោក Raisi បាន​ប្រាប់​លោក Putin នៅ​ក្នុង​ការ​អត្ថាធិប្បាយ​តាម​កញ្ចក់​ទូរទស្សន៍​ថា នៅ​ពេល​បច្ចុប្បន្ន ខណៈ​ដែល​រុស្ស៊ី​កំពុងតែ​ផុងខ្លួន​កាន់តែ​ជ្រៅចូល​ក្នុង​ការ​ប្រឈម​ជាមួយ​សហរដ្ឋអាមេរិក វា​ដល់​ពេល​ដែល​ត្រូវ​យកឈ្នះ​អាមេរិក ដោយ​ការ​រួប​រួម​គ្នា​កាន់តែ​ពេញលេញ​រវាង​ប្រទេស​របស់​លោក​ទាំង​២​។

​វា​ជា​ផ្នែក​តូច​មួយ​នៃ​បញ្ហា​ភូមិសាស្ត្រ​នយោបាយ​នៅ​វិមាន​ក្រឹម​ឡាំង ​ចំពេល​ដ៏​រសើប​សម្រាប់​ទីក្រុង Washington និង​ជា​គូរ​សត្រូវ​របស់​ខ្លួន​លោក Raisi ជា​ប្រធានាធិបតី​ប្រកាន់​តឹង​របស់​អ៊ីរ៉ង់ ដែល​បាន​ចាប់ផ្ដើម​បំពេញ​ទស្សនកិច្ច​រយៈពេល ​២​ថ្ងៃ​នៅ​ទីក្រុង​ម៉ូស្គូ​កាលពី​ថ្ងៃ​ពុធ បាន​បង្ហាញ​ពី​ទំនាក់ទំនង​ដ៏​រឹងមាំ​រវាង​ប្រទេស​ទាំង​២ ដែល​ជា​រឿយៗ​គិតគូរ​ដល់​ផលប្រយោជន៍ និង​ផ្សះផ្សា​ទំនាក់​ទំនងជា​ប្រ​វត្ត​សាស្ត្រ​ដែល​ប្រះ​ស្រាំ។ ​មេដឹកនាំ​ទាំង ​២ ​បាន​កោតសរសើរ​គ្នា​ទៅវិញទៅមក​ពី​កិច្ចសហប្រតិបត្តិការរវាង​ប្រទេស​ទាំង​២ ដោយ​បង្ហាញ​ពី​កិច្ចខិតខំ​ប្រឹងប្រែង​ក្នុងការ​បញ្ឈប់​អំពើ​ភេរវកម្ម ពិសេស​នៅក្នុង​ការគាំទ្រ​របស់​ប្រទេស​ទាំង​២​ ដល់​កងកម្លាំង​រដ្ឋាភិបាល​នៅ​ប្រទេស​ស៊ី​រី​។​

លោក Raisi បាន​និយាយថា រដ្ឋបាល​របស់លោកកំពុង​ព្យាយាម​រំដោះខ្លួន ឬ​ប​ន្យា​ប​ទណ្ឌកម្ម​ដែល​បានដាក់​ដោយសារ​ការដួលរលំ​ នៃ​កិច្ចព្រមព្រៀង​នុយក្លេអ៊ែរ​របស់​ទីក្រុង​តេ​អេ​រ៉ង់​ជាមួយ​មហាអំណាច​ពិភពលោក​។ ​រុស្ស៊ី​ក៏​ជា​ភាគី​មួយ​ក្នុងចំណោម​ភាគី​ផ្សេងទៀត​ផងដែរនៃ​កិច្ចព្រមព្រៀង​ឆ្នាំ​២០១៥ ដែល​បានកំណត់​កម្មវិធី​នុយក្លេអ៊ែរ​របស់​អ៊ីរ៉ង់​ជា​ថ្នូរ​នឹង​ការដក​ទណ្ឌកម្ម​៕

អត្ថបទ៖ សុខមាន