​បាល់ទាត់៖ ​ក្រុម​អេហ្ស៊ីប និង​នី​ហ្សេ​រី​យ៉ា​បាន​ឈានឡើង​វគ្គ ១៦​ក្រុម​ចុងក្រោយ​ហើយ​នៃ​ព្រឹត្តិការណ៍​បាល់ទាត់​ជើងឯក​ទ្វីប​អាហ្វ្រិក Africa Cup of Nations​។​ ​ប្រកួត​ចុងក្រោយ​នៅ​ក្នុង​ពូ​ល D អេហ្ស៊ីប​បាន​យកឈ្នះ​ក្រុម​ស៊ូដង់ ១-០ ដោយ​គ្រាប់​បាល់ ១​គ្រាប់​គត់​ក្នុង​ការ​ប្រកួត​សំរេច​បាន​ដោយ Mohamed Abdelmonem តែ​ត​បញ្ចូល​ទី​នៅ​នាទី​ទី៣៥​។​

​​ខ្សែប្រយុទ្ធ Liverpool, Mohamed Salah ក៏មាន​វត្តមាន​ក្នុងការ​ប្រកួត​នេះ​តែ​គ្មាន​សំណាង​ បន្ទាប់ពី​មានឱកាស​តែ​ជួយ​បាន​ដោយ​អ្នកចាំទី​ស៊ូដង់​។ ​ជ័យជំនះ​នេះ​អេហ្ស៊ីប​មាន ៦ពិន្ទុ​ពី​ការប្រកួត ៣លើក​បញ្ចប់​ការប្រកួត​ក្នុង​ពូ​ល​ចំណាត់ថ្នាក់​លេខ ២ ឡើង​វគ្គ ១៦ក្រុម​ចុងក្រោយ​ជួប​ជាមួយ​ក្រុម​លេខ ១ នៅក្នុង​ពូ​ល E ដែល​ត្រូវ​ប្រកួត​យប់​នេះ​។​ ​ចំណែក​ស៊ូដង់​ដែល​ធ្លាប់ជា​ជើងឯក​នៅ​ឆ្នាំ១៩៧០ បាន​បង្ហាញ​ខ្លួន​ក្នុង​ព្រឹត្តិការណ៍​ជា​លើកដំបូង​រាប់​ពី​ឆ្នាំ២០១២ បាន​ត្រឹម​ចំណាត់ថ្នាក់​លេខ ៣ ក្នុង​ពូ​ល​មានតែ ១ពិន្ទុ​។

​​ងាក​មក​មួយ​ប្រកួត​ទៀត​នៅក្នុង​ពូ​ល D នេះ​នី​ហ្សេ​រី​យ៉ា​បញ្ចប់​ពូ​ល​ក្នុងនាម​ជា​ក្រុម​លេខ ១ ក្រោយ​លេង​ ៣ប្រកួត​ឈ្នះ​ទាំងបី​។ ​ប្រកួត​ចុងក្រោយ​ក្នុង​ពូ​ល​ក្រុម​ជើងឯក​ ៣សម័យ​នី​ហ្សេ​រី​យ៉ា​បាន​យក​ឈ្នះ​ក្រុម​ហ្គី​ណេ​ប៊ី​សាវ ២-០ ដោយ​គ្រាប់​បាល់​របស់ Umar Sadiq ក្រោយទទួល​បាល់​បញ្ជូន​របស់ Kelechi Iheanacho ខណៈ​គ្រាប់​ទី​ពីរ​ធ្វើបាន​ដោយ​ប្រធាន​ក្រុម William Troost-Ekong​។ ​នី​ហ្សេ​រី​យ៉ា​ក្នុងនាម​ក្រុម​លេខ ១ ក្នុង​ពូ​ល D នេះ​នឹងត្រូវ​ឡើង​វគ្គ ១៦ក្រុម​ចុងក្រោយ​ជួប​ជាមួយ​ក្រុម​លេខ ៣ ល្អ​បំផុត​មកពី​ពូ​ល B, E រឺ F៕

​អត្ថបទ​៖​នាង សុភា​វុ​ធ