ក្មេងស្រី Huda Abu Naja ដេកស្តូកស្តឹងទាំងគ្មានកម្លាំងកំហែងក្នុងខ្លួន នៅលើពូកស្តើងក្នុងសំពត់តង់គ្រួសាររបស់នាងនៅជំរំជម្លៀសខ្លួន ស្ថិតក្នុងទីក្រុងភាគកណ្តាល Deir el-Balah នៃតំបន់ហ្កាហ្សា ។

ដៃក្មេងស្រីអាយុ ១២ឆ្នាំម្នាក់នេះ ស្គមស្លេកស្លាំងខ្លាំង ហើយស្បែករបស់នាងដណ្តប់ឆ្អឹង ជាសញ្ញាមួយបញ្ជាក់ថា នាងជួបកង្វះអាហារូបត្ថម្ភធ្ងន់ធ្ងរបំផុត ។

អ្នកស្រី Somia Abu Naja ដែលត្រូវជាម្តាយរបស់ក្មេងស្រី Huda និយាយថា កូនស្រីរបស់គាត់ទទួលរងកង្វះអាហារូបត្ថម្ភធ្ងន់ធ្ងរ ចាប់តាំងពីខែមីនារហូតមក ពេលដែលអ៊ីស្រាអែលបិទព្រំដែនហ្កាហ្សា ។

អ្នកស្រីបន្តថា កូនស្រីរបស់គាត់ម្នាក់នេះ សម្រាករយៈពេល ៣ខែនៅក្នុងមន្ទីរពេទ្យ ហើយស្ថានភាពរបស់នាងពុំល្អប្រសើរទាល់តែសោះ ហើយអ្នកស្រីក៏បានសម្រេចចិត្តនាំកូនមកជំរំសំពត់តង់វិញ ក្រោយមើលឃើញក្មេង ៥នាក់ដាច់ពោះស្លាប់នៅក្នុងមន្ទីរពេទ្យ Nasser ស្ថិតនៅទីក្រុងភាគខាងត្បូង Khan Younis ។

អ្នកស្រី Somia និយាយទៀតថា នាងធ្លាប់តែមានទម្ងន់ ៣៥គ.ក ប៉ុន្តែឥឡូវនាងមានទម្ងន់ត្រឹមតែ ២០គ.កប៉ុណ្ណោះ ។

យោងតាមការអះអាងរបស់ក្រុមអាជ្ញាធរសុខភាពក្នុងស្រុក បានឲ្យដឹងថា ក្មេងស្រី Huda ស្ថិតនៅក្នុងចំណោមក្មេងប៉ាឡេស្ទីនរាប់ម៉ឺននាក់ផ្សេងទៀតដែល ជួបកង្វះអាហារូបត្ថម្ភធ្ងន់ធ្ងរនៅក្នុងតំបន់ហ្កាហ្សា ៕