រដ្ឋាភិបាលន័រវែស បានថ្លែងនៅថ្ងៃអាទិត្យ (ទី២៤ ខែសីហា)នេះថា ខ្លួននឹងបរិច្ចាគប្រមាណ ៧ ពាន់លានក្រោនន័រវែស (៦៩៦,១២ លានដុល្លារ) ដើម្បីទិញប្រព័ន្ធការពារដែនអាកាស ឲ្យប្រទេសអ៊ុយក្រែន។

នាយករដ្ឋមន្ត្រីន័រវែស លោក Jonas Gahr Store បាននិយាយនៅក្នុងសេចក្តីថ្លែងការណ៍ថា៖«រួមគ្នាជាមួយប្រទេសអាល្លឺម៉ង់ ឥឡូវនេះ យើងកំពុងធានាថា អ៊ុយក្រែនទទួលបានប្រព័ន្ធការពារដែនអាកាសដ៏មានឥទ្ធិពល»។

«ប្រទេសអាល្លឺម៉ង់ និងន័រវែស កំពុងធ្វើការយ៉ាងជិតស្និទ្ធជាមួយគ្នា ដើម្បីគាំទ្រអ៊ុយក្រែន ក្នុងការប្រយុទ្ធរបស់ខ្លួន ដើម្បីការពារប្រទេស និងការពារប្រជាជនស៊ីវិលប្រឆាំងនឹងការវាយប្រហារតាមអាកាសរបស់    រុស្ស៊ី»។ 

ប្រទេសន័រវែស និងអាល្លឺម៉ង់ កំពុងផ្តល់មូលនិធិដល់ប្រព័ន្ធ Patriot ចំនួនពីរគ្រឿង រួមទាំងមីស៊ីលផង   ដែរ។ លើសពីនេះទៅទៀតនោះ ប្រទេសន័រវែស កំពុងរួមចំណែកដល់ការទិញរ៉ាដាការពារដែនអាកាសពីក្រុមហ៊ុនផលិតរបស់អាល្លឺម៉ង់ Hensoldt និងប្រព័ន្ធការពារអាកាសពីក្រុមហ៊ុន Kongsberg។