ប្រធានកម្មវិធីស្បៀងអាហារពិភពលោក(WFP)បានសម្តែងការខកចិត្តនិងមានកំហឹងចំពោះវិបត្តិស្បៀងអាហារនៅតំបន់ហ្កាហ្សាស្ទ្រីបដែលកាន់តែអាក្រក់ទៅៗ ក្នុងពេលមានការវាយលុករបស់យោធាអ៊ីស្រាអែលនៅតែបន្ត។

នាយកប្រតិបត្តិ អង្គការWFP លោកស្រី Cindy McCain បាននិយាយដូច្នេះនៅក្នុងបទសម្ភាសន៍ជាមួយប្រព័ន្ធផ្សព្វផ្សាយ NHK នៅទីក្រុង Yokohama ភាគខាងត្បូងទីក្រុងតូក្យូ ប្រទេសជប៉ុន។ អង្គការសហប្រជាជាតិបាននិយាយនៅថ្ងៃតែមួយនោះថា ទុរភិក្សត្រូវបានបញ្ជាក់ក្នុងទីក្រុងហ្កាហ្សា និងតំបន់ជុំវិញនោះ។ លោកស្រី McCain បានពណ៌នាអំពីស្ថានភាពស្បៀងអាហារនៅតំបន់ហ្កាហ្សាថាជា«មហន្តរាយ»។

លោកស្រីនិយាយថា«មានកង្វះអាហារូបត្ថម្ភធ្ងន់ធ្ងរ។ អ្នកបានឃើញមនុស្សស្លាប់ដោយសារតែអត់ឃ្លាននៅទីនោះ»។ លោកស្រី McCain និយាយថា អង្គការស្បៀងអាហារពិភពលោក(WFP) គឺជា «អង្គការធំបំផុត និងល្អបំផុត និងតែមួយគត់ ដែលអាចដឹកជញ្ជូនអាហារទ្រង់ទ្រាយធំចូលទៅតំបន់ហ្កាហ្សា ដែលត្រូវការ»។ ប៉ុន្តែលោកស្រីបានពន្យល់ថា កង្វះស្បៀងអាហារបាននិងកំពុងកើនឡើង ខណៈសកម្មភាពជំនួយត្រូវបានរារាំងក្នុងពេលមានការវាយលុករបស់យោធាអ៊ីស្រាអែលនៅបន្ត។

អង្គការWFP ខ្វះមូលនិធិ ខណៈរដ្ឋបាលរបស់លោកប្រធានាធិបតីអាមេរិក Donald Trump បានកាត់ជំនួយបរទេសយ៉ាងច្រើន។ ប្រជាជននៅតំបន់ហ្កាហ្សា កំពុងរងគ្រោះដោយការខ្វះស្បៀងធ្ងន់ធ្ងរ។

ទន្ទឹមនឹងនេះ ប្រទេសនានាកំពុងទម្លាក់ស្បៀងអាហារនិងការផ្គត់ផ្គង់ជំនួយតាមអាកាស ខណៈអ៊ីស្រាអែលកំពុងរឹតបន្តឹងការដឹកជញ្ជូនតាមផ្លូវគោក។ ស្បៀងអាហារ និងជំនួយដែលបានទម្លាក់តាមអាកាស គឺជាខ្សែជីវិតមួយសម្រាប់ប្រជាជននៅតំបន់ហ្កាហ្សា ដោយមនុស្សជាច្រើនរត់ទៅរកគ្រឿងផ្គត់ផ្គង់។ កញ្ចប់មួយបានធ្លាក់នៅលើដំបូលផ្ទះ បុរសម្នាក់គ្រវីដំបងបណ្ដេញមនុស្សចេញ ហើយនៅទីតាំងមួយផ្សេងទៀត មនុស្សកំពុងតែតស៊ូដើម្បីទទួលបានស្បៀងអាហារ ខណៈបុរសម្នាក់បាននិយាយថា «ខ្ញុំត្រូវរបួសដោយកាំបិតក្នុងពេលកំពុងព្យាយាមដណ្តើមយកស្បៀងអាហារ»។