របបយោធាដែលកំពុងកាន់អំណាចរបស់សហភាពមីយ៉ាន់ម៉ា បាននិយាយកាលពីថ្ងៃអាទិត្យ (២៤ សីហា) ថា ស្ពានសម័យអាណានិគមដែលធ្លាប់ជាផ្លូវរថភ្លើងខ្ពស់បំផុតរបស់ពិភពលោកដ៏ប្រវត្តិសាស្ត្រ ឈ្មោះថា Gokteik ត្រូវទទួលរងការ "ទម្លាក់គ្រាប់បែក និងបំផ្លិចបំផ្លាញ" ដោយក្រុមប្រដាប់អាវុធប្រឆាំងរដ្ឋប្រហារ។

សង្រ្គាមស៊ីវិលបានលេបត្របាក់មីយ៉ាន់ម៉ា ចាប់តាំងពីរដ្ឋប្រហារឆ្នាំ២០២១ បានទម្លាក់រដ្ឋាភិបាលស៊ីវិលមក ដោយយោធាបានបន្តប្រយុទ្ធជាមួយក្រុមទ័ពព្រៃគាំទ្រលទ្ធិប្រជាធិបតេយ្យ និងអង្គការប្រដាប់អាវុធជនជាតិភាគតិចជាច្រើន។

អ្នកនាំពាក្យរបស់របបសឹក លោក Zaw Min Tun បាននិយាយក្នុងសេចក្តីថ្លែងការណ៍មួយទៅកាន់ប្រព័ន្ធផ្សព្វផ្សាយថា កងទ័ពរំដោះជាតិ តាអាង (TNLA) និងកងកម្លាំងការពារប្រជាជន បាន "ទម្លាក់គ្រាប់បែក និងបំផ្លាញ" ស្ពាន Gokteik ។ សេចក្តីថ្លែងការណ៍មួយទៀតរបស់រដ្ឋាភិបាលយោធាបាននិយាយថា ស្ពាននេះត្រូវ "បំផ្ទុះដោយគ្រាប់មីន"។ អ្នកនាំពាក្យកងកម្លាំងតាអាង TNLA បានច្រានចោលការចោទប្រកាន់នេះ ហើយនិយាយថា របបយោធាទេដែលជាអ្នកទម្លាក់គ្រាប់បែកលើស្ពាននោះ។

ដោយមានកម្ពស់ ១០២ម៉ែត្រពីលើជ្រលងភ្នំដ៏ជ្រៅ ស្ពាន Gokteik Viaduct នេះគឺជាស្ពានខ្ពស់បំផុតនៅមីយ៉ាន់ម៉ា និងធ្លាប់ជាផ្លូវរថភ្លើងខ្ពស់បំផុតលើពិភពលោក នៅពេលបើកដំណើរការដំបូងនៅឆ្នាំ១៩០១ ក្នុងសម័យអាណានិគមអង់គ្លេស។ ស្ពាននេះតភ្ជាប់ទីក្រុង Mandalay ទៅភាគខាងជើងរដ្ឋ Shan ដោយផ្លូវដែក និងទាក់ទាញភ្ញៀវទេសចរមួយចំនួន។ វីដេអូ និងរូបភាពលើបណ្តាញសង្គមបានបង្ហាញឱ្យឃើញថា ស្ពាននេះបានបាក់ និងខូចខាតដោយផ្នែក៕