លោកស្រី Catherine Russell នាយកប្រតិបត្តិអង្គការកុមារ យូនីសេហ្វ (UNICEF) បាននិយាយកាលពីថ្ងៃអាទិត្យ (២៤ សីហា) ថា វិបត្តិទុរ្ភិក្សនៅដែនដីហ្កាហ្សា បណ្តាលមកពីអសមត្ថភាពក្នុងការផ្តល់ជំនួយ ច្រើនជាងមកពីការខ្វះខាតស្បៀងអាហារពិតប្រាកដ។

លោកស្រី Russell ប្រាប់សារព័ត៌មាន CBS ថា "កុមារបានអត់ទ្រាំអស់ជាច្រើនខែដោយមិនមានអាហារគ្រប់គ្រាន់ ហើយអ្វីដែលគ្រប់គ្នាមើលឃើញគឺជាស្ថានភាពដ៏អាក្រក់មួយ ដែលកុមារស្ថិតក្នុងភាពស្រេកឃ្លានធ្ងន់ធ្ងរ ហើយនៅទីបំផុត អត់ឃ្លានដល់ស្លាប់"។

លោកស្រី Russell បានសង្កត់ធ្ងន់ពីភាពដែលអាចរារាំងបាននៃវិបត្តិទុរ្ភិក្ស ដោយលើកឡើងថា មានស្បៀងអាហារនៅក្បែរនោះ ប៉ុន្តែមិនអាចទៅដល់អ្នកដែលត្រូវការ។ ប្រមុខយូនីសេហ្វរូបនេះនិយាយថា "ទុរ្ភិក្សមិនកើតឡើងដោយសារតែព្យុះស៊ីក្លូន ឬគ្រោះរាំងស្ងួតអ្វីទេ ប៉ុន្តែកើតដោយសារតែគេមិនអាចយកជំនួយគ្រប់គ្រាន់ ឱ្យដល់កុមារទាំងនោះបាន"។

លើសពីនេះ លោកស្រី Russell ក៏បានរិះគន់យន្តការមូលនិធិមនុស្សធម៌ហ្កាហ្សា (GHF) របស់អ៊ីស្រាអែល ដោយនិយាយថា វិធីសាស្រ្តរបស់ទីភ្នាក់ងារជំនួយនេះ ផ្ទុយនឹងស្តង់ដារមនុស្សធម៌ ដោយកន្លងមកអង្គការសហប្រជាជាតិ បានដំណើរការចំណុចចែកចាយជំនួយ ៤០០ទីតាំង បើធៀបនឹងទីតាំងចំនួន៤ ប៉ុណ្ណោះរបស់មូលនិធិនេះ។

យោងតាមក្រសួងសុខាភិបាលរបស់ហ្កាហ្សា យន្តការជំនួយរបស់ GHF នេះ បាននាំឱ្យជនជាតិប៉ាឡេស្ទីនជាង ២.០០០ នាក់ស្លាប់ និងរបួសជាង ១៥.០០០នាក់ទៀត នៅពេលកំពុងរង់ចាំយកជំនួយ៕