គ្រឿងចក្រឈូសឆាយរបស់អ៊ីស្រាអែល បានគាស់រំលើងដើមឈើរាប់រយដើម នៅក្នុងភូមិ Al-Mughayyirនៃតំបន់វេសបែង(West Bank) កាលពីថ្ងៃអាទិត្យ ដោយមានវត្តមានរបស់យោធាអ៊ីស្រាអែល។ នេះបើយោងតាមក្រុមអ្នកសារព័ត៌មានដែលបានឃើញកន្លែងកើតហេតុនោះ។

ដើមឈើដែលត្រូវបានគេគាស់រំលើងភាគច្រើន ជាដើមអូលីវ ដែលមានសារៈសំខាន់សម្រាប់សេដ្ឋកិច្ច និងវប្បធម៌នៃតំបន់វេសបែង ខណៈពេលដែលដើមអូលីវ ក៏ជាមូលហេតុនាំឲ្យមានការប៉ះទង្គិចគ្នាដោយហិង្សារវាងកសិករ និងអ្នកតាំងលំនៅអ៊ីស្រាអែល ដែលរំលោភបំពាន។

លោក Abdelatif Mohammed Abu Aliya កសិករក្នុងស្រុកមកពីភូមិក្បែរដែលនៅជិតទីក្រុងរ៉ាម៉ាឡា ( Ramallah) បាននិយាយថា ខ្លួនបានបាត់បង់ដើមអូលីវ ដែលមានអាយុលើសពី ៧០ឆ្នាំ នៅលើផ្ទៃដីប្រហែលមួយហិកតា។

លោកបានអះអាងថា៖«ពួកគេបានគាស់រំលើងដើមឈើឲ្យដួលរាប់ដល់ដី ក្រោមគោលបំណងក្លែងបន្លំ» ដោយពន្យល់ថា ខ្លួននិងអ្នកស្រុកផ្សេងទៀត បានចាប់ផ្ដើមដាំឡើងវិញនូវដើមឈើដែលត្រូវបានគាស់រំលើងទាំងអស់នោះ។

អ្នកថតរូបរបស់សារព័ត៌មាន AFP បានឃើញជាក់ស្តែងនូវ ដីដែលត្រូវបានឈូសឆាយ ដើមអូលីវដួល         រណូករណែលនៅលើដី និងគ្រឿងចក្រឈូសឆាយជាច្រើនគ្រឿង ដែលកំពុងប្រតិបត្តិការ នៅលើភ្នំជុំវិញភូមិនោះ។