ក្រុមអ្នកជំនាញនិយាយថា ក្រោមការដឹកនាំរបស់ប្រធានាធិបតីលោក ដូណាល់ ត្រាំ (Donald Trump) សហរដ្ឋអាមេរិក កំពុងស្តារទំនាក់ទំនងឡើងវិញ ជាមួយក្រុមមេដឹកនាំយោធានៅអាហ្រ្វិកខាងលិច ដោយឈរលើមូលដ្ឋានគាំទ្រគ្នាទៅវិញទៅមក ដោយបានផ្តល់ជំនួយក្នុងការប្រយុទ្ធ ជាមួយក្រុមសកម្មប្រយុទ្ធ ដើម្បីធនធានរ៉ែ ក្នុងតំបន់Sahel។

ខណៈពេលដែលលោក ចូ បៃដិន ( Joe Biden) កាន់តំណែង សហរដ្ឋអាមេរិក បានផ្អាកជំនួយផ្នែកអភិវឌ្ឍន៍ និងយោធាភាគច្រើន ដែលលោក បានបញ្ជូនទៅកាន់ប្រទេសប៊ួគីណាហ្វាសូ ម៉ាលី និងនីហ្សេ បន្ទាប់ពីមានរដ្ឋប្រហារ ដែលនាំឲ្យរដ្ឋាភិបាលយោធាឡើងកាន់អំណាច នៅក្នុងប្រទេសទាំងបី ដែលមានភាពវឹកវរ នៅចន្លោះឆ្នាំ ២០២០ និង ២០២៣។

ការវិលត្រឡប់របស់លោក ត្រាំ មកកាន់តំណែងសេតវិមានវិញ បានជំរុញសហរដ្ឋអាមេរិកពង្រឹងជំហរនោះ ដែលជាផ្នែកមួយនៃការជំរុញដ៏ទូលំទូលាយ នៅក្នុងគោលនយោបាយការបរទេសអាហ្វ្រិករបស់ទីក្រុង   វ៉ាស៊ីនតោន និងកិច្ចប្រឹងប្រែងរបស់ខ្លួន ដើម្បីទប់ទល់ឥទ្ធិពលរបស់រុស្ស៊ី និងចិន នៅលើទ្វីបនេះ។

លោក Troy Fitrell មន្ត្រីជាន់ខ្ពស់របស់ក្រសួងការបរទេសទទួលបន្ទុកកិច្ចការអាហ្វ្រិក បានថ្លែងប្រាប់កិច្ចប្រជុំមួយ នៅទីក្រុង Abidjan ប្រទេសកូតឌីវ័រ កាលពីខែឧសភាថា៖«ពាណិជ្ជកម្ម មិនមែនជំនួយទេ ឥឡូវនេះ គឺពិតជាគោលនយោបាយរបស់យើងសម្រាប់ទ្វីបអាហ្រ្វិក»។

ក្នុងប៉ុន្មានសប្តាហ៍ថ្មីៗនេះ ឥស្សរជនជាន់ខ្ពស់អាមេរិកមួយចំនួនទៀត បានទៅបំពេញទស្សនកិច្ច ទៅកាន់រដ្ឋធានីនៃប្រទេសប៊ួគីណាហ្វាសូ ម៉ាលី និងនីហ្សេ ដែលសុទ្ធតែបានតស៊ូ ដើម្បីកម្ចាត់ក្រុមសកម្មប្រយុទ្ធដែលមានទំនាក់ទំនងជាមួយក្រុមអាល់កៃដា ( Al-Qaeda) ឬក្រុមដេស ( Daesh) អស់រយៈពេលជាងមួយទសវត្សរ៍មកហើយនោះ។