តម្លៃប្រេងបានឡើងខ្ពស់បន្តិច នៅថ្ងៃចន្ទ (ទី២៥ ខែសីហា) នេះ បន្ទាប់ពីប្រទេសអ៊ុយក្រែនបានបង្កើនការវាយប្រហារលើរុស្ស៊ី ដោយធ្វើឲ្យមានក្តីបារម្ភខ្លាំងឡើងៗ ដែលថា ការផ្គត់ផ្គង់ប្រេងរបស់រុស្ស៊ី អាចត្រូវបានរំខាន ខណៈពេលដែលការរំពឹងទុកនៃការកាត់បន្ថយអត្រាការប្រាក់របស់សហរដ្ឋអាមេរិក បានជួយជំរុញដល់ទស្សនវិស័យ សម្រាប់កំណើនពិភពលោក និងតម្រូវការប្រេងឥន្ធនៈ។

តម្លៃហ៊ុនប្រេងឆៅម៉ាក Brent បានឡើង ៣សេន ឬ ០,០៤ភាគរយ ដោយឡើងដល់ ៦៧,៧៦ដុល្លារ ក្នុងមួយបារ៉ែល នៅម៉ោង ៣:៤២នាទី (ម៉ោងសកល) ហើយហ៊ុនប្រេងឆៅ West Texas Intermediate (WTI) បានហក់ឡើង ៧សេន ឬ ០,១១ភាគរយ ពោលគឺមួយបារ៉ែល មានតម្លៃ ៦៣,៧៣ដុល្លារ។

ក្រុមមន្ត្រីរុស្ស៊ី បានប្រាប់ឲ្យដឹងថា អ៊ុយក្រែនបានបើកការវាយប្រហារដោយយានដ្រូនលើប្រទេសរុស្ស៊ី កាលពីថ្ងៃអាទិត្យចុងសប្ដាហ៍កន្លងមក ដែលបាននាំឲ្យមានការធ្លាក់ចុះយ៉ាងខ្លាំងនូវសមត្ថភាពរបស់រ៉េអាក់ទ័រ នៅរោងចក្រថាមពលនុយក្លេអ៊ែរដ៏ធំបំផុតមួយរបស់រុស្ស៊ី និងបានបង្កឲ្យមានអណ្ដាតភ្លើងឆាបឆេះយ៉ាងសន្ធោសន្ធៅ នៅឯស្ថានីយនាំចេញប្រេងឥន្ធនៈ Ust-Luga។

បន្ថែមពីលើនេះ អភិបាលតំបន់ស្តីទី បានប្រាប់ថា អគ្គិភ័យនៅរោងចក្រចម្រាញ់ប្រេង Novoshakhtinsk របស់រុស្ស៊ី ដែលបង្កឡើងដោយការវាយប្រហារដោយយានដ្រូនរបស់អ៊ុយក្រែន បានកំពុងឆាបឆេះមិនទាន់រលត់នៅឡើយទេ ដែលជាថ្ងៃទី៤ ហើយ កាលពីថ្ងៃអាទិត្យ។ រោងចក្រចម្រាញ់ប្រេងនេះ លក់ឥន្ធនៈជាចម្បង សម្រាប់ការនាំចេញ និងមានសមត្ថភាពផលិតប្រេងប្រចាំឆ្នាំ ៥លានតោន ឬប្រហែល ១០០.០០០បារ៉ែល ក្នុងមួយថ្ងៃ។

លោក Tony Sycamore អ្នកវិភាគទីផ្សាររបស់ក្រុមហ៊ុន IG បាននិយាយថា៖ «ដោយសារអ៊ុយក្រែនកំពុងជោគជ័យ ក្នុងការការកំណត់គោលដៅលើហេដ្ឋារចនាសម្ព័ន្ធប្រេងរបស់រុស្ស៊ី ហានិភ័យ សម្រាប់តម្លៃប្រេងឆៅ កំពុងផ្លាស់ប្ដូរទៅរកនិន្នការឡើងខ្ពស់»៕