អនុប្រធានាធិបតីអមេរិក លោក JD Vance បានពោលសរសើរ «ការទូតដ៏សកម្មខ្លាំងក្លា» របស់លោក Donald Trump ជាមួយរុស្ស៊ី ហើយបានទទូចថា រដ្ឋបាលអាមេរិក នឹងនាំសង្រ្គាមរយៈពេល ៣ឆ្នាំ រវាងអ៊ុយក្រែន និងរុស្ស៊ីឲ្យឈានដល់ទីបញ្ចប់។

ប៉ុន្តែខណៈដែលការលើកឡើងរបស់លោកត្រូវបានចាក់ផ្សាយនៅលើកម្មវិធី Meet the Press របស់ប្រព័ន្ធផ្សព្វផ្សាយ NBC កាលពីថ្ងៃអាទិត្យ (ទី២៤ ខែសីហា) អ្នកការទូតជាន់ខ្ពស់របស់រុស្ស៊ីកំពុងធ្វើឲ្យការរំពឹងទុកនោះមើលទៅទំនងមិនកើតឡើងឡើយ ខណៈដែលមិនសូវជាឃើញមានវឌ្ឍនភាពដែលត្រូវបានធ្វើឡើង រវាងលោក Donald Trump លោក Vladimir Putin លោក Volodymyr Zelensky និងបណ្ដាមេដឹកនាំអឺរ៉ុបមួយចំនួន នៅក្នុងកិច្ចប្រជុំយ៉ាងលឿនរហ័សជាបន្តបន្ទាប់ ក្នុងរយៈពេល ២សប្តាហ៍កន្លងមកនេះ។ 

លោក Vance បានប្រាប់ពិធីការនី Kristen Welker នៅក្នុងបទសម្ភាសន៍ថតទុកមុនថា ភាគីទាំង ២ បានបង្ហាញពីការបើកចំហរបស់ពួកគេ ក្នុងការទទួលយក «សម្បទានសំខាន់ៗ» ក្នុងប៉ុន្មានថ្ងៃថ្មីៗនេះ ហើយបាននិយាយថា លោកប្រធានាធិបតីបើកចំហ ចំពោះការបង្កើនសម្ពាធ ប្រសិនបើភាគីម្ខាងៗត្រូវបានមើលឃើញថា ជាឧបសគ្គដល់ដំណើរការសន្តិភាព។ 

លោក Vance បាននិយាយថា៖ «នេះគឺជាការទូតដ៏សកម្មខ្លាំងក្លាដែលនឹងនាំឲ្យសង្គ្រាមនេះឈានដល់ទីបញ្ចប់។ ពេលខ្លះយើងមានអារម្មណ៍ថា យើងមាននូវវឌ្ឍនភាពដ៏អស្ចារ្យជាមួយរុស្ស៊ី ហើយពេលខ្លះដូចដែលប្រធានាធិបតី បាននិយាយអ៊ីចឹង លោកមានការខកចិត្តយ៉ាងខ្លាំង ចំពោះរុស្ស៊ី។ យើងនឹងបន្តធ្វើអ្វីដែលយើងត្រូវធ្វើ ដើម្បីនាំឲ្យបញ្ហាញនេះឈានដល់ទីបញ្ចប់»។ 

លោកបានបន្ថែមថា មេដឹកនាំរុស្ស៊ី លោក Vladimir Putin «បានធ្វើសម្បទានយ៉ាងធំដល់លោកប្រធានាធិបតី Trump ជាលើកដំបូង ក្នុងរយៈពេល ៣ឆ្នាំកន្លះនៃជម្លោះនេះ» ក្នុងអំឡុងពេលមានជំនួបកំពូលរបស់លោកជាមួយលោក Trump កាលពីថ្ងៃទី១៥ ខែសីហា នៅទីក្រុង Anchorage រដ្ឋ Alaska។ 

យ៉ាងណាក្ដី លោក Vance មិនអាចប្រាប់ឲ្យបានជាក់លាក់នូវវឌ្ឍនភាពដែលរដ្ឋបាលរបស់លោក Trump កំពុងតែដំណើរការនោះទេ ខណៈដែលមន្ត្រីរុស្ស៊ី និងសហរដ្ឋអាមេរិក បានផ្តល់ការបកស្រាយផ្សេងៗគ្នា អំពីអ្វីដែលបានព្រមព្រៀង នៅឯកិច្ចប្រជុំកំពូល ក្នុងរដ្ឋ Alaska។ 

ប៉ុន្តែសម្បទានទាំង២ ដែលមន្ត្រីអាមេរិកដាក់ឈ្មោះ បន្ទាប់ពីមានជំនួបកំពូលនោះ គឺការធានាសន្តិសុខឲ្យអ៊ុយក្រែន និងការរំពឹងទុកនៃជំនួប រវាងលោក Zelensky និងលោក Putin ក្នុងរយៈពេល ២សប្តាហ៍ខាងមុខ។ ឥឡូវនេះ កិច្ចការទាំង២ នោះ ហាក់ដូចជាកៀកនឹងអ្វីមិនអាចកើតឡើងបាន បើទោះជាមិនទាន់ត្រូវបានចាត់ថា ដួលរលំក៏ដោយ៕