មេដឹកនាំនៃចលនាហាម៉ាសប៉ាឡេស្ទីន បាននិយាយនៅលើបណ្តាញសង្គម Telegram ថា ការវាយប្រហារចុងក្រោយរបស់អ៊ីស្រាអែលទៅលើយេម៉ែន គឺជាការរំលោភលើអធិបតេយ្យភាពនៃរដ្ឋអារ៉ាប់ទាំងអស់។

ក្រុមហាម៉ាស បាននិយាយថា៖«ការឈ្លានពានរបស់អ៊ីស្រាអែលប្រឆាំងនឹងយេម៉ែន គឺជាការបំពានយ៉ាងធ្ងន់ធ្ងរលើច្បាប់អន្តរជាតិ និងជាការរំលោភលើអធិបតេយ្យភាពនៃប្រទេសអារ៉ាប់ទាំងអស់។

ក្រុមនេះ បានអំពាវនាវដល់ប្រទេសអារ៉ាប់ និងឥស្លាមទាំងអស់ឲ្យ«គាំទ្រយេម៉ែន ចំពោះមុខការវាយប្រហារនេះ» និងបានអរគុណដល់អ្នកគាំទ្រចលនាឧទ្ទាម Ansar Allah ឬ ក្រុមហ៊ួទី សម្រាប់សកម្មភាពរបស់ពួកគេប្រឆាំងនឹងអ៊ីស្រាអែល។

កាលពីថ្ងៃអាទិត្យ ទូរទស្សន៍ Al Masirah ដែលជាកម្មសិទ្ធិរបស់ចលនា Ansar Allah បានរាយការណ៍ថា អ៊ីស្រាអែល បានបើកការវាយប្រហារតាមអាកាសទៅលើទីតាំងថាមពលនៃទីក្រុង Sanaa ដែលស្ថិតនៅក្រោមការគ្រប់គ្រងរបស់ក្រុមហ៊ួទី។ ក្រុមហ៊ុនប្រេងយេម៉ែ (YPC) ដែលជាស្ថានីយចាក់ប្រេង និងរោងចក្រថាមពល Haziz ត្រូវរងការបាញ់ផ្លោង។ យោងតាមប្រភពរបស់ចលនា Al Masirah នៅក្នុងក្រសួងការពារជាតិគ្រប់គ្រងដោយក្រុមហ៊ួទី កងកម្លាំងការពារដែនអាកាសរបស់ក្រុមឧទ្ទាមនេះ បានវាយបក   ទៅលើការវាយប្រហារដោយយន្តហោះអ៊ីស្រាអែលភាគច្រើន ដោយបង្ខំឲ្យពួកគេចាកចេញពីដែនអាកាសយេ   ម៉ែន ហើយយ៉ាងហោចណាស់មនុស្ស២នាក់ ត្រូវបានស្លាប់ និង ៣៥នាក់ផ្សេងទៀត រងរបួស។

យោងតាមកងកម្លាំងការពារអ៊ីស្រាអែល ពួកគេបានវាយប្រហារទៅលើគោលដៅរបស់ក្រុមហ៊ួទី នៅក្នុងតំបន់ Sanaa រួមទាំងអគារវិមានប្រធានាធិបតី រោងចក្រថាមពលចំនួនពីរ និងឃ្លាំងប្រេងឥន្ធនៈ ដែលពួកវាទាំងអស់ ត្រូវបានប្រើប្រាស់សម្រាប់គោលបំណងយោធា។