បើតាមអ្នកនាំពាក្យអយ្យការ កាលពីថ្ងៃអាទិត្យ (ទី២៤ ខែសីហា) បានឲ្យដឹងថា រដ្ឋអាជ្ញាពិសេសកូរ៉េខាងត្បូងដែលកំពុងស៊ើបអង្កេតករណីច្បាប់អាជ្ញាសឹករបស់ប្រទេស កាលពីខែធ្នូ បានដាក់សំណើទៅកាន់តុលាការ ដើម្បីឃុំខ្លួនអតីតនាយករដ្ឋមន្ត្រី លោក Han Duck-soo។

អ្នកនាំពាក្យ លោកស្រី Park Ji-young បានប្រាប់អ្នកសារព័ត៌មានថា តំណាងអយ្យការបានចោទប្រកាន់លោក Han ថា បានជួយដល់អតីតប្រធានាធិបតី លោក Yoon Suk Yeol នៅក្នុងការប្រកាសច្បាប់អាជ្ញាសឹក និងបាននិយាយមិនពិត។

លោក Yoon កំពុងប្រឈមនឹងការកាត់ទោសបទល្មើសព្រហ្មទណ្ឌរួចហើយ ជុំវិញការចោទប្រកាន់ពីបទបះបោរ។ កាលពីខែមេសា មេដឹកនាំអភិរក្សនិយមរូបនេះ ត្រូវបានដកចេញពីតំណែង ជុំវិញការប៉ុនប៉ងមិនបានសម្រេចរបស់លោក ដើម្បីដាក់ចេញនូវច្បាប់អាជ្ញាសឹក ដែលធ្វើឲ្យប្រទេសនេះធ្លាក់ចូលក្នុងភាពចលាចលផ្នែកនយោបាយ។

លោក Han ដែលជានាយករដ្ឋមន្ត្រីក្រោមការដឹកនាំរបស់លោក Yoon បានក្លាយជាប្រធានាធិបតីស្តីទី បន្ទាប់ពីលោក Yoon ត្រូវបានចោទប្រកាន់ទម្លាក់តំណែង។ បន្ទាប់មក លោកបានលាលែងពីមុខតំណែង ដើម្បីឈរឈ្មោះក្នុងការបោះឆ្នោតខែមិថុនា ដើម្បីក្លាយជាប្រធានាធិបតីបន្ទាប់ ប៉ុន្តែបានបញ្ចប់ការប៉ុនប៉ងរបស់លោក បន្ទាប់ពីមានការប្រេះឆាក្នុងចំណោមក្រុមអភិរក្សនិយម។

សារព័ត៌មាន Reuters មិនអាចទាក់ទងលោក Han ភ្លាមៗបានឡើយ ដើម្បីសុំការអត្ថាធិប្បាយ។ ក្នុងប៉ុន្មានសប្តាហ៍ថ្មីៗនេះ រដ្ឋអាជ្ញាបាននិងកំពុងសាកសួរលោក Han ពាក់ព័ន្ធនឹងករណីច្បាប់អាជ្ញាសឹក ប៉ុន្តែលោក Han មិនបានឆ្លើយតបនឹងសំណួររបស់អ្នកសារព័ត៌មានឡើយ៕