លោក Vinay Kumar គឺជាឯកអគ្គរដ្ឋទូតឥណ្ឌាប្រចាំនៅរុស្ស៊ីនិយាយថា ឥណ្ឌានឹងបន្តទិញប្រេងពីទីកន្លែងណាដែលពួកគេទទួលបានកិច្ចព្រមព្រៀងល្អបំផុត ដើម្បីការពារផលប្រយោជន៍ពលរដ្ឋ ១,៤ពាន់លាននាក់របស់ខ្លួន ។

សេចក្តីថ្លែងការណ៍របស់លោក Kumar បានកើតមានឡើង រយៈពេលប៉ុន្មានថ្ងៃប៉ុណ្ណោះ មុនពេលដែលការដំឡើងពន្ធ ៥០ភាគរយរបស់ប្រធានាធិបតីសហរដ្ឋអាមេរិកលោក Donald Trump លើប្រទេសឥណ្ឌា រួមទាំងការពិន័យពន្ធចំនួន ២៥ភាគរយលើការទិញប្រេង និងអាវុធរបស់រុស្ស៊ី គ្រោងនឹងចូលជាធរមាន ។

កាលពីថ្ងៃអាទិត្យម្សិលមិញ អនុប្រធានាធិបតីសហរដ្ឋអាមេរិកលោក JD Vance និយាយថា លោក Trumpបានប្រកាសពន្ធបន្ទាប់បន្សំលើឥណ្ឌា ដើម្បីអនុវត្តទំនាស់សេដ្ឋកិច្ចឈ្លានពានលើរុស្ស៊ី និងបង្ខំឲ្យពួកគេបញ្ឈប់សង្រ្គាមនៅអ៊ុយក្រែន ។

ការនាំចូលប្រេងឆៅតម្លៃថោករុស្ស៊ីកើនឡើងរបស់ទីក្រុងញូវដែល្លី ចាប់តាំងពីសង្រ្គាមអ៊ុយក្រែនចាប់ផ្តើម បានធ្វើឲ្យជាប់គាំងទំនាក់ទំនងរបស់ពួកគេជាមួយសហរដ្ឋអាមេរិក និងធ្វើឲ្យប៉ះពាល់ដល់កិច្ចចរចាលើកិច្ចព្រមព្រៀងពាណិជ្ជកម្មផងដែរ ។

ប្រេងឆៅរុស្ស៊ី បានស្មើនឹង ៣៥-៤០ភាគរយនៃការនាំចូលប្រេងរបស់ឥណ្ឌានៅក្នុងឆ្នាំ ២០២៤ ពោលគឺកើនឡើងពីចំនួន ៣ភាគរយកាលពីឆ្នាំ ២០២១ ។

សហរដ្ឋអាមេរិកចោទប្រកាន់ថា ការទិញប្រេងរុស្ស៊ីរបស់ឥណ្ឌា នឹងជួយផ្តល់មូលនិធិដល់សង្រ្គាមនៅប្រទេសអ៊ុយក្រែន គឺជាការចោទប្រកាន់មួយដែលទីក្រុងដែល្លី ច្រានចោល ។

លោក Kumar និយាយប្រាប់ទីភ្នាក់ងារព័ត៌មាន TASSរបស់រុស្ស៊ីកាលពីថ្ងៃអាទិត្យថា ពាណិជ្ជកម្មរបស់ឥណ្ឌាផ្អែកលើកត្តាទីផ្សារ ហើយអាទិភាពកំពូលរបស់ខ្លួននៅតែជាសន្តិសុខថាមពលសម្រាប់ពលរដ្ឋរបស់ពួកគេ ។ 

លោកបានឡើងផងដែរពីគោលជំហររបស់ឥណ្ឌាថា ការសម្រេចចិត្តរបស់លោក Trump ក្នុងការដំឡើងពន្ធបន្ទាប់បន្សំគឺ “ពុំយុត្តិធម៌ ពុំមានហេតុផល និងពុំត្រឹមត្រូវ” ៕