នៅថ្ងៃចន្ទនេះ ព្យុះទីហ្វុង Kajiki កំពុងបោកបក់ឆ្ពោះទៅកាន់តំបន់ឆ្នេរភាគកណ្តាលប្រទេសវៀតណាម ដោយនាំមកជាមួយកម្លាំងខ្យល់បក់ និងភ្លៀងធ្លាក់ខ្លាំងនៅខេត្ត Nghe An បង្កការជន់លិចដងផ្លូវ និងធ្វើឲ្យខូចខាតដំបូលផ្ទះ រយៈពេលប៉ុន្មានម៉ោងប៉ុណ្ណោះ ដែលគេរំពឹងថាវានឹងបោកបក់ដល់ដីគោក ។

នៅទីក្រុង Vinh រលកទឹកសមុទ្រកញ្រ្ជោលឡើង និងបោកផ្ទប់សួនកម្សាន្តនៅតាមតំបន់ឆ្នេរ ស្របពេលដែលប្រជាពលរដ្ឋយកបាវខ្សាច់ទប់នៅមុខទ្វារអគារ និងរចនាសម្ព័ន្ធផ្សេងទៀត ពេលដែលពួកគេប្រឈមការមកដល់របស់ព្យុះ Kajiki ។

លោក Dang Xuan Phuong គឺជាម្ចាស់សណ្ឋាគារវ័យ ៤៨ឆ្នាំមួយរូប និយាយថា វាគួរឲ្យខ្លាចខ្លាំងណាស់ ។ លោកអាចមើលឃើញរលកសមុទ្រកម្ពស់ ២ម៉ែត្រ ហើយទឹកបានជន់លិចនៅតាមដងផ្លូវនៅជុំវិញរូបលោក ។ នេះពិតជាគួរឲ្យខ្លាចមែនទែន នៅសល់រយៈពេល ៥-៦ម៉ោងទៀតប៉ុណ្ណោះ ព្យុះនឹងបោកបក់មកដល់ហើយ ។

វៀតណាម បានបិទអាកាសយានដ្ឋាន សាលារៀន និងចាប់ផ្តើមធ្វើការជម្លៀសពលរដ្ឋទ្រង់ទ្រាយធំ ពេលដែលពួកគេត្រៀមខ្លួនសម្រាប់ព្យុះដ៏ខ្លាំងក្លាបំផុត មកទល់នឹងពេលនេះ ក្នុងឆ្នាំនេះ ។ រដ្ឋាភិបាលនិយាយនៅថ្ងៃចន្ទនេះថា មនុស្សប្រហែល ៣ម៉ឺននាក់ ត្រូវបានជម្លៀសចេញពីតំបន់ឆ្នេរ ។

ទីភ្នាក់ងារឧតុនិយមវៀតណាម និយាយថា ព្យុះ Kajiki ដែលមានសន្ទុះខ្យល់បក់ ១៦៦គ.មក្នុង ១ម៉ោងនៅក្នុងសមុទ្រ កំពុងស្ថិតនៅចម្ងាយប្រហែល ១១០គ.មពីតំបន់ភាគខាងជើងនៃតំបន់ឆ្នេរភាគកណ្តាលវៀតណាម គិតត្រឹមវេលាម៉ោង ៣ និង ០០នាទី ម៉ោងសកល ហើយវាគ្រោងនឹងបោកបក់ដល់ដីគោកនៅរសៀលថ្ងៃចន្ទនេះ ៕