ប្រធានាធិបតីអ៊ុយក្រែនលោក Volodymyr Zelenskiy និយាយនៅថ្ងៃចន្ទនេះថា ទីក្រុងគីវ មានគោលបំណងស្វែងរកថវិកាប្រចាំខែយ៉ាងហោច ១ពាន់លានដុល្លារ ដើម្បីទិញអាវុធសហរដ្ឋអាមេរកតាមរយៈកម្មវិធី PURL របស់អង្គការណាតូ ។

ថ្លែងរួមគ្នាជាមួយនាយករដ្ឋមន្រ្តីន័រវែសលោក Jonas Gahr Store នៅទីក្រុងគីវ លោក Zelenskiy និយាយកោតសរសើរដល់ការសម្រេចចិត្តរបស់ប្រទេសន័រវែស ក្នុងការចូលរួមគំនិតផ្តួចផ្តើម និងបានឆ្លុះបញ្ចាំងពីតួនាទីរបស់ពួកគេក្នុងការការពារសន្តិសុខថាមពលអ៊ុយក្រែន ស្របពេលមានការវាយប្រហារពីរុស្ស៊ី ។ 

លោក Store បានបញ្ជាក់ឡើងវិញការគាំទ្រសម្រាប់សមត្ថភាពការពារដែនអាកាស និងសមុទ្ររបស់អ៊ុយក្រែន ដោយលោកនិយាយថា ន័រវែសចង់ឲ្យមានកិច្ចព្រមព្រៀងសន្តិភាពជាមួយរុស្ស៊ី មុនពេលរួមចំណែកការធានាសន្តិសុខរបស់លោកខាងលិច សម្រាប់ទីក្រុងគីវ ។

លោក Zelenskiy និយាយដែរថា លោកនឹងជួបជាមួយប្រេសិតពិសេសសហរដ្ឋអាមេរិកលោក Keith Kellogg នៅថ្ងៃនេះ ដើម្បីពិភាក្សាលើការរៀបចំលទ្ធភាពនៃជំនួបនាពេលអនាគតជាមួយប្រធានាធិបតីរុស្ស៊ីលោក Vladimir Putin ដោយលោកបន្តថា ក្រុមមន្រ្តីសហរដ្ឋអាមេរិក និងក្រុមមន្រ្តីអ៊ុយក្រែន ត្រូវបានរំពឹងថានឹងជួបគ្នាពិភាក្សាបញ្ហានេះ ក្នុងសប្តាហ៍នេះផងដែរ ៕