លោកស្រី Varsen Aghabekian គឺជារដ្ឋមន្រ្តីការបរទេសរបស់អាជ្ញាធរប៉ាឡេស្ទីននិយាយនៅថ្ងៃចន្ទនេះថា ចំនួនមនុស្សស្លាប់នៅតំបន់ហ្កាហ្សា បានកើនឡើងដល់ ៦២.០០០នាក់ ហើយមនុស្សយ៉ាងហោច ១៥ម៉ឺននាក់ បានរងរបួស ក្នុងនោះតួលេខពិតប្រាកដអាចនឹងមានចំនួនខ្ពស់ជាងនេះ ។

អំឡុងសន្និសីទសារព័ត៌មានរួមគ្នាជាមួយរដ្ឋមន្រ្តីការបរទេសស្លូវេនីលោកស្រី Tanja Fajon នៅរដ្ឋធានី Ljubljana លោកស្រី Aghabekian និយាយថា នៅថ្ងៃនេះ ៨០ភាគរយនៃតំបន់ហ្កាហ្សា ស្ថិតក្នុងភាពរង្គោះរង្គើរ ហើយពួកយើងទើបតែដឹងពីទំហំនៃការខូចខាត ទំហំនៃការសម្លាប់រង្គាល ហើយនិងទំហំនៃអ្នករងរបួស នៅពេលដែលពួកយើងអាចវាយតម្លៃនៅហ្នឹងកន្លែង ។

លោកស្រី Aghabekian បានធ្វើការថ្កោលទោសផងដែរផែនការពង្រីកការតាំងលំនៅនិគមន៍ “E1” របស់អ៊ីស្រាអែល ដែលក្រុមអ្នករិះគន់និយាយថា វានឹងកាត់ផ្តាច់តំបន់វ៉េសប៊ែងពីតំបន់ហ្សេរុយសាឡឹមខាងកើត ។

លោកស្រីនិយាយថា សំណើមួយនេះ គឺជាការគំរាមកំហែងដោយផ្ទាល់ដល់សន្តិភាព និងសន្តិសុខ មិនត្រឹមតែនៅតំបន់មជ្ឈិមបូព៌ាមួយប៉ុណ្ណោះទេ មិនត្រឹមតែអ៊ីស្រាអែល ប៉ាឡេស្ទីន ប៉ុន្តែសម្រាប់ពិភពលោកទាំងមូលផងដែរ ហើយវាគឺជាទំនួលខុសត្រូវសមូហភាពរបស់ពួកគេ ដើម្បីក្រោកឈរយ៉ាងមុតមាំប្រឆាំងនឹងផែនការអាណានិគមន៍ និងវាតទីនិយមមួយនេះ ។

រដ្ឋមន្រ្តីទាំង ២ បានធ្វើការសង្កត់ធ្ងន់ផងដែរពីតម្រូវការសន្តិភាពនៅក្នុងតំបន់ ។ យោងតាមការអះអាងរបស់លោកស្រី Aghabekian បានឲ្យដឹងថា នេះត្រូវការបទឈប់បាញ់ពេញលេញពីអ៊ីស្រាអែល ក៏ដូចជាការដោះលែងចំណាប់ថ្នូរទាំងអស់ ៕