ស្បែកដណ្តប់ឆ្អឹង គឺជាអ្វីដែលសេសសល់តែមួយគត់សម្រាប់ក្មេងស្រីអាយុ ៧ឆ្នាំ Mai Abu Arar ។ ក្មេងស្រីប៉ាឡេស្ទីនម្នាក់នេះ ស្ថិតក្នុងចំណោមកុមាររាប់ម៉ឺននាក់ ប្រឈមនឹងកង្វះអាហារូបត្ថម្ភធ្ងន់ធ្ងរនៅតំបន់ហ្កាហ្សា ស្របពេលដែលគ្រោះទុរ្ភិក្សបង្កឡើងដោយមនុស្សរបស់អ៊ីស្រាអែល កាន់តែលិចលង់ជ្រៅឡើង ក្នុងនោះយោធាអ៊ីស្រាអែលនៅតែបង្កើនការវាយប្រហាររបស់ពួកគេលើទីក្រុងហ្កាហ្សា ។

អ្នកស្រី Nadia Abu Arar គឺជាម្តាយរបស់ក្មេងស្រី Mai និយាយថា កូនស្រីរបស់គាត់ធ្លាប់រស់នៅក្នុងជីវិតកក់ក្តៅសប្បាយរីករាយ ប៉ុន្តែឥឡូវនាងប្រឹងស៊ូទ្រាំ ដើម្បីអាចបន្តជីវិតរបស់នាងបាន ក្រោយស្រកទម្ងន់យ៉ាងច្រើន ។

អ្នកស្រី Nadia និយាយប្រាប់កាសែត Al Jazeera ថា គ្រូពេទ្យនិយាយប្រាប់គាត់ថា នាងគ្មានជំងឺអ្វីនោះទេ បញ្ហាម្យ៉ាងគត់គឺនាងជួបកង្វះអាហារូបត្ថម្ភធ្ងន់ធ្ងរ ហើយអ្នកស្រី ពុំបានមើលឃើញភាពល្អប្រសើរណាមួយលើស្ថានភាពរបស់កូនស្រីរបស់គាត់នោះឡើយ ។

ភាពអត់ឃ្លានបានធ្វើឲ្យក្មេងស្រី Mai ចុះខ្សោយកម្លាំងខ្លាំង ដល់ចំណុចដែលនាងអាចទទួលអាហាររាវបានតាមសឺរ៉ាំងប៉ុណ្ណោះ ។

លោក Hisham Abu Al Oun គឺជាគ្រូពេទ្យកុមារនៅមន្ទីរពេទ្យ Patient’s Friends ស្ថិតក្នុងទីក្រុងហ្កាហ្សា និយាយថា អ៊ីស្រាអែលការពារការចែកចាយឱសថចូលដែនដីមួយនេះ ដែលធ្វើឲ្យមន្ទីរពេទ្យជួបការលំបាកខ្លាំងក្នុងការព្យាបាលអ្នកជំងឺជួបកង្វះអាហារូបត្ថម្ភ ។

លោកនិយាយថា ប៉ូតាស្យូមក្លរីន គឺជាថ្នាំពេទ្យងាយស្រួលបំផុតដែលគ្រូពេទ្យអាចចេញវេជ្ជបញ្ជាបាន ។ ពួកយើងគ្មានវានោះទេ ពួកយើងមានទារកស្លាប់ដោយសារតែពួកយើងគ្មានវា ។ ពេលខ្លះការផ្គត់ផ្គង់ថ្នាំពេទ្យបែបនេះ មកដល់ ប៉ុន្តែសំណាងអាក្រក់ វាមានចំនួនតិចតួចប៉ុណ្ណោះ ៕