អ្នកនាំពាក្យរដ្ឋាភិបាលសហរដ្ឋអាមេរិក បានបញ្ជាក់នៅថ្ងៃចន្ទ (២៥ សីហា) ថា អ្នកចរចាពាណិជ្ជកម្មជាន់ខ្ពស់របស់ប្រទេសចិន លោក Li Chenggang ត្រូវបានរំពឹងថានឹងធ្វើដំណើរទៅកាន់ទីក្រុងវ៉ាស៊ីនតោន នៅក្នុងសប្តាហ៍នេះ ដើម្បីជួបពិភាក្សាជាមួយក្រុមមន្ត្រីអាមេរិក។

អ្នកនាំពាក្យរូបនេះបន្តថា លោក Li ដែលជាតំណាងពាណិជ្ជកម្មអន្តរជាតិរបស់ចិន និងជាអ្នកចរចាដ៏សំខាន់មួយរូបជាមួយប្រមុខសេដ្ឋកិច្ចចិន លោក He Lifeng អាចនឹងជួបជាមួយក្រុមមន្ត្រីរដ្ឋាភិបាលកម្រិតអនុរដ្ឋមន្រ្តីរបស់សហរដ្ឋអាមេរិក ដោយបន្ថែមថា ដំណើរទស្សនកិច្ចនេះមិនមែនជាផ្នែកនៃកិច្ចប្រជុំចរចាផ្លូវការនោះទេ។ ក្រសួងពាណិជ្ជកម្មចិន មិនបានឆ្លើយតបភ្លាមៗចំពោះសំណើសុំការអត្ថាធិប្បាយលើរឿងនេះនៅឡើយទេ។

ពាណិជ្ជករទាំងសងខាងនៃមហាសមុទ្រប៉ាស៊ីហ្វិក កំពុងរង់ចាំមើលថាតើកិច្ចព្រមព្រៀងពន្ធគយចុងក្រោយបំផុតក្នុងខែនេះរវាងអាមេរិក-ចិន នឹងក្លាយជាអចិន្ត្រៃយ៍ឬទេ ឬក៏លោកប្រធានាធិបតីអាមេរិក Donald Trump អាចនឹងដាក់រលកពន្ធខ្ពស់ៗជាថ្មីម្តងទៀតលើការនាំចូលរបស់ទីក្រុងប៉េកាំង។

ប្រទេសដែលមានសេដ្ឋកិច្ចធំជាងគេទាំងពីររបស់ពិភពលោក កាលពីថ្ងៃទី១១ ខែសីហា បានព្រមព្រៀងគ្នាក្នុងការបន្តកិច្ចព្រមព្រៀងបន្ទាប់ពន្ធបណ្ដោះអាសន្នសម្រាប់រយៈពេល ៩០ថ្ងៃទៀតដល់ខែវិច្ឆិកា ដោយបានបន្ទាបពន្ធមកត្រឹម ៣០% លើការនាំចូលរបស់អាមេរិកពីប្រទេសចិន និងពន្ធ ១០% លើទំនិញអាមេរិក ទៅកាន់ប្រទេសចិន៕