នាយករដ្ឋមន្ត្រី លោក Benjamin Netanyahu បាននិយាយថា អ៊ីស្រាអែលមានការសោកស្តាយយ៉ាងខ្លាំងចំពោះអ្វីដែលលោកបានពិពណ៌នាថាជា «មហន្តរាយដ៏សោកសៅ» ដែលបានកើតឡើងនៅមន្ទីរពេទ្យ Nasser ភាគខាងត្បូងតំបន់ហ្កាហ្សា កាលពីថ្ងៃចន្ទ។ ការវាយប្រហាររបស់អ៊ីស្រាអែល ទៅលើមន្ទីរពេទ្យ Nasser បានសម្លាប់មនុស្សយ៉ាងហោចណាស់២០នាក់ រួមមានទាំងអ្នកសារព័ត៌មាន៥នាក់បម្រើការឱ្យទីភ្នាក់ងាររួមមានReuters APនិង Al Jazeera។

អាជ្ញាធរសុខាភិបាលប៉ាឡេស្ទីនបាននិយាយថាលោក Hussam al-Masri ជាអ្នកជាប់កិច្ចសន្យារបស់ សារព័ត៌មានReuters ត្រូវបានសម្លាប់នៅជិតទីតាំងផ្សាយផ្ទាល់ដែលដំណើរការដោយ Reuters នៅជាន់ខាងលើមន្ទីរពេទ្យក្នុងទីក្រុង Khan Younis ក្នុងការវាយប្រហារដំបូង។ មន្ត្រីនៅមន្ទីរពេទ្យ និងសាក្សី បាននិយាយថា អ៊ីស្រាអែលក្រោយមកបានវាយប្រហារលើទីតាំងនេះជាលើកទីពីរ ដោយបានសម្លាប់អ្នកសារព័ត៌មានAP និង Al Jazeera ព្រមទាំងបុគ្គលិកជួយសង្គ្រោះ និងគ្រូពេទ្យសង្គ្រោះបឋមដែលបានប្រញាប់ប្រញាល់ទៅកាន់កន្លែងកើតហេតុដើម្បីជួយសង្គ្រោះ។

អ្នកថតរូបម្នាក់ លោក Hatem Khaled ដែលជាអ្នកជាប់កិច្ចសន្យារបស់សារព័ត៌មាន Reuters បានរងរបួស។ យោធាអ៊ីស្រាអែល និងកងកម្លាំងការពារអ៊ីស្រាអែល បានទទួលស្គាល់ការវាយប្រហារនៅតំបន់មន្ទីរពេទ្យ Nasser និងបាននិយាយថា នាយសេនាធិការបានបញ្ជាឱ្យមានការស៊ើបអង្កេតក្នុងករណីនេះ។