ក្រុមមនុស្សធម៌របស់អង្គការសហប្រជាជាតិ បាននិយាយកាលពីថ្ងៃចន្ទថា ជាលើកដំបូងក្នុងរយៈពេល១០ ខែមកនេះ ក្បួនរថយន្តដឹកជំនួយបានទៅដល់តំបន់ Dilling ក្នុងរដ្ឋ South Kordofan របស់ប្រទេសស៊ូដង់ ដោយមានគ្រឿងផ្គត់ផ្គង់សង្គ្រោះជីវិត។ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា ក្បួនរថយន្តរបស់មូលនិធិកុមារអង្គការសហប្រជាជាតិ នឹងត្រូវធ្វើដំណើរទៅកាន់រដ្ឋធានីរដ្ឋ Kadugli ។

អង្គការOCHA បាននិយាយថាការផ្គត់ផ្គង់នឹងផ្តល់ប្រយោជន៍ដល់ជនងាយរងគ្រោះជាង១២០.០០០នាក់នៅតំបន់ Dilling និង Kadugli ដែលតម្រូវការមនុស្សធម៌បានឈានដល់កម្រិតដ៏មហន្តរាយ ហើយសហគមន៍នានាបានស្ថិតនៅក្រោមការហ៊ុមព័ទ្ធរយៈពេលជាច្រើនខែមកហើយ។ ទោះជាយ៉ាងណា ការិយាល័យមនុស្សធម៌ បាននិយាយថា អំពើហិង្សានៅតែបន្តកើនឡើងនៅក្នុងរដ្ឋ North Darfur ។

អង្គការទេសន្តប្រវេសន៍អន្តរជាតិ បានប៉ាន់ប្រមាណថា អសន្តិសុខបានបង្ខំមនុស្សប្រហែល១.០០០នាក់ឱ្យភៀសខ្លួនចេញពីជំរំជនភៀសខ្លួន Abu Shouk ដែលរងគ្រោះដោយទុរ្ភិក្សនៅជាយរដ្ឋធានី El Fasher ដែលត្រូវបានហ៊ុមព័ទ្ធ។

អង្គការ OCHA បាននិយាយថា ជំរំ Abu Shouk ដែលរងការវាយប្រហារបង្ហូរឈាម ក្នុងប៉ុន្មានសប្តាហ៍ថ្មីៗនេះ មានការចាប់ពង្រត់ស្ត្រី និងកុមារតូចៗ ហើយក៏មានរបាយការណ៍អំពីរលកថ្មីៗនៃអំពើហិង្សានៅក្នុងរដ្ឋធានី El Fasher រួមមានការបាញ់ផ្លោងកាំភ្លើងធំទៅលើមន្ទីរពេទ្យដែលដំណើរការជាសំខាន់ផងដែរ។ ការិយាល័យមនុស្សធម៌បានសម្តែងការព្រួយបារម្ភយ៉ាងខ្លាំងចំពោះវិបត្តិអាហារូបត្ថម្ភកាន់តែធ្ងន់ធ្ងរនៅក្នុងទីក្រុង Melit រដ្ឋ North Darfur ។ ការស្ទង់មតិនាពេលថ្មីៗនេះ បានរកឃើញថា កុមារម្នាក់ក្នុងចំណោមកុមារបីនាក់ខ្វះអាហារូបត្ថម្ភធ្ងន់ធ្ងរ បណ្តាលអោយកុមាររាប់ពាន់នាក់ដែលមានអាយុក្រោម៥ ឆ្នាំប្រឈមនឹងហានិភ័យនៃជំងឺ ផលវិបាកនៃការលូតលាស់ និងការស្លាប់។