អ្នកនាំពាក្យក្រសួងការបរទេសចិន លោក Lin Jian បាននិយាយនៅក្នុងសន្និសីទសារព័ត៌មាន ដោយអត្ថាធិប្បាយអំពីបាយការណ៍របស់សារព័ត៌មានអាល្លឺម៉ង់ Die Welt ថា ប្រទេសចិន មិនមានបំណងដាក់ពង្រាយយោធា នៅក្នុងប្រទេសអ៊ុយក្រែន ជាផ្នែកមួយនៃការធានាសន្តិសុខនោះទេ។

អ្នកការទូតរូបនេះ បានកត់សម្គាល់ថា៖«ព័ត៌មាននេះ គឺមិនពិតទេ។ ជំហររបស់ចិនចំពោះបញ្ហាអ៊ុយក្រែនគឺច្បាស់លាស់ និងមិនផ្លាស់ប្តូរទេ»។

នាពេលថ្មីៗនេះ កាសែត Die Welt ដែលដកស្រង់ប្រភពនានា បានរាយការណ៍ថា ភាគីចិន បានត្រៀម ដាក់ពង្រាយយោធារបស់ខ្លួន នៅក្នុងប្រទេសអ៊ុយក្រែន ក្នុងក្របខ័ណ្ឌនៃបេសកកម្មរក្សាសន្តិ ភាព។

ក្រុមអ្នកនយោបាយអឺរ៉ុប បានលើកឡើងកាន់តែខ្លាំងឡើងអំពីលទ្ធភាពដាក់ពង្រាយទាហានលោកខាងលិច ក្នុងប្រទេសអ៊ុយក្រែន ដើម្បីដោះស្រាយវិបត្តិ ដែលជាផ្នែកមួយនៃការធានាសន្តិសុខ បន្ទាប់ពីកិច្ចប្រជុំកាលពីថ្ងៃទី ១៨ ខែសីហា នៅទីក្រុងវ៉ាស៊ីនតោន រវាងលោក វ៉្លូឌីមី ហ្សេឡិនស្គី និងប្រធានាធិបតីអាមេរិក លោក ដូណាល់ ត្រាំ (Donald Trump)។ ទីក្រុងមូស្គូប្រឆាំងនឹងវត្តមានកងទ័ពរបស់អង្គាការណាតូ នៅប្រទេសអ៊ុយក្រែន។ កាលពីថ្ងៃទី ២១ ខែសីហា រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergey Lavrov) បានសង្កត់ធ្ងន់ថា រាល់មធ្យោបាយធានាសន្តិសុខរបស់អ៊ុយក្រែន តាមរយៈ«ការអន្តរាគមន៍យោធាបរទេសលើផ្នែកណាមួយនៃទឹកដីអ៊ុយក្រែន» នឹងមិនអាចទទួលយកបានសម្រាប់រុស្ស៊ីឡើយ។