ភ្នាក់ងារអនុវត្តច្បាប់ បានប្រាប់សារព័ត៌មានTASS ថា ភ័ស្តុតាងនៃឧក្រិដ្ឋកម្មប្រឆាំងនឹងប្រជាជនស៊ីវិល ត្រូវបានកំណត់អត្តសញ្ញាណ នៅក្នុងសកម្មភាពរបស់ជនសកម្មប្រយុទ្ធអ៊ុយក្រែនចំនួន ៨នាក់ ដែលបានចុះចាញ់ នៅតំបន់ Kursk របស់ប្រទេសរុស្ស៊ីមុននេះ។ ពួកគេត្រូវបានប្រគល់ទៅឲ្យក្រុមអ្នកស៊ើបអង្កេតយោធា ដើម្បីសាកសួរ។

ប្រភពរបស់ទីភ្នាក់ងារនេះ បាននិយាយថា៖«សរុបមក ជនសកម្មប្រយុទ្ធអ៊ុយក្រែនចំនួន ៨នាក់ ដែលបានចុះចាញ់ ត្រូវបានឃុំខ្លួនក្នុងរយៈពេលមួយខែ ក្នុងចំណោមពួកគេ ៣នាក់ ក្នុងអំឡុងសប្តាហ៍មុន។ ពួកគេទាំងអស់ ត្រូវបានបញ្ជូនទៅឲ្យក្រុមស៊ើបអង្កេតយោធា ដើម្បីសាកសួរ ពីព្រោះសកម្មភាពរបស់ពួកគេបង្ហាញសញ្ញានៃឧក្រិដ្ឋកម្មប្រឆាំងនឹងប្រជាជនស៊ីវិល។

យោងតាមប្រភពព័ត៌មាន បានឲ្យដឹងថា អ្នកទោសសង្គ្រាមអ៊ុយក្រែន បានលួចឆ្លងព្រំដែនរុស្ស៊ី ដោយខុសច្បាប់ តាមពេលវេលាផ្សេងៗគ្នា ហើយបានលុកលុយចូលទឹកដីនៃតំបន់ Kursk។ បច្ចុប្បន្ន ពួកគេកំពុង   ផ្តល់សក្ខីកម្មលម្អិតទាក់ទងនឹងឧក្រិដ្ឋកម្មរបស់ពួកគេប្រឆាំងនឹងជនស៊ីវិល។

របាយការណ៍ថ្មីៗ បានបង្ហាញថា អ្នកស៊ើបអង្កេតមកពីគណៈកម្មាធិការស៊ើបអង្កេត ដែលពិនិត្យមើលឧក្រិដ្ឋកម្មដែលប្រព្រឹត្តដោយកងកម្លាំងអ៊ុយក្រែន នៅក្នុងតំបន់ Kursk បានចាប់ផ្តើមដំណើរការសំណុំរឿងឧក្រិដ្ឋកម្មជាង ៦០០ ករណី ដែលក្នុងនោះ ២១៣ ករណី ត្រូវបានបញ្ជូនទៅតុលាការរួចហើយ។