ជនភៀសខ្លួនរ៉ូហ៊ីងយ៉ារាប់ម៉ឺននាក់មកពីមីយ៉ាន់ម៉ា ដែលរស់នៅក្នុងជំរំរាប់សិបកន្លែងលើទឹកដីបង់ក្លាដែស បានប្រារព្ធខួបលើកទី៨ នៃការជម្លៀសខ្លួនទ្រង់ទ្រាយធំរបស់ពួកគេ ដោយទាមទារឱ្យមានការវិលត្រឡប់ដោយសុវត្ថិភាពទៅកាន់ទឹកដីកំណើតពីមុនវិញនៅក្នុងរដ្ឋរ៉ាឃីន របស់សហភាពមីយ៉ាន់ម៉ា។

ជនភៀសខ្លួនទាំងនោះបានប្រមូលផ្តុំគ្នាយ៉ាងកុះករកាលពីថ្ងៃចន្ទ (២៥ សីហា) នៅក្នុងទីវាលមួយនៅឯជំរំ Kutupalong ក្នុងស្រុក Cox's Bazar ភាគអាគ្នេយ៍ប្រទេសបង់ក្លាដែស ដែលជាទីតាំងនៃជំរំជនភៀសខ្លួនដ៏ធំ។ អ្នកទាំងនោះនាំគ្នាកាន់បដាដែលសរសេរថា "គ្មានជីវិតជនភៀសខ្លួនទៀតទេ" និង "ការធ្វើមាតុភូមិនិវត្តន៍ជាដំណោះស្រាយចុងក្រោយ" ក្នុងពេលប្រារព្ធនូវអ្វីដែលពួកគេហៅថាជា ទិវាចងចាំអំពើប្រល័យពូជសាសន៍រ៉ូហ៊ីងយ៉ា។

ទន្ទឹមនឹងនេះ មេដឹកនាំបណ្តោះអាសន្នរបស់បង់ក្លាដែស លោក Muhammad Yunus ក៏បានជំរុញសហគមន៍អន្តរជាតិឱ្យជួយសម្រួលដល់ដំណើរការវិលត្រឡប់ទៅកន្លែងកំណើតវិញប្រកបដោយសុវត្ថិភាពរបស់ជនភៀសខ្លួនទាំងនោះ។

មីយ៉ាន់ម៉ា បានបើកការបង្រ្កាបដ៏ធំក្នុងខែសីហា ឆ្នាំ២០១៧ បន្ទាប់ពីការវាយប្រហារដោយក្រុមបះបោរលើប៉ុស្តិ៍យាមនៅរដ្ឋរ៉ាឃីន ហើយនៅពេលនោះ ជនមូស្លីមរ៉ូហ៊ីងយ៉ារាប់សែននាក់ បានចាប់ផ្តើមចាកចេញពីមីយ៉ាន់ម៉ា ទៅកាន់តំបន់ជិតខាងនានា។ ពេលនោះ បង់ក្លាដែស បញ្ជាឱ្យបើកព្រំដែន ដែលនៅទីបំផុត អនុញ្ញាតឱ្យជនភៀសខ្លួនជាង ៧០ម៉ឺននាក់ ចូលជ្រកកោននៅក្នុងប្រទេសដែលភាគច្រើនកាន់សាសនាអ៊ិស្លាមមួយនេះ៕