អគ្គលេខាធិការអង្គការសហប្រតិបត្តិការឥស្លាម (OIC) លោក Hissein Brahim Taha កាលពីថ្ងៃចន្ទ បានអំពាវនាវឲ្យមានបទឈប់បាញ់ជាបន្ទាន់ និងអចិន្ត្រៃយ៍ នៅក្នុងតំបន់ហ្កាហ្សា ដោយជំរុញឲ្យបញ្ចប់ការឈ្លានពានរបស់អ៊ីស្រាអែល និងការដកទ័ពអ៊ីស្រាអែលទាំងស្រុង។

ថ្លែងនៅក្នុងសម័យប្រជុំវិសាមញ្ញលើកទី ២១ នៃក្រុមប្រឹក្សារដ្ឋមន្ត្រីការបរទេស OIC នៅទីក្រុង Jeddah នៃប្រទេសអារ៉ាប់ប៊ីសាអ៊ូឌីត លោក Taha បានថ្កោលទោសអ្វី ដែលលោកបានពិពណ៌នាថា ជាអំពើប្រល័យពូជសាសន៍ ការបោសសម្អាតជនជាតិភាគតិច ការផ្លាស់ទីលំនៅដោយបង្ខំ ការបំផ្លិចបំផ្លាញជាប្រព័ន្ធ និងការបិទផ្លូវខុសច្បាប់នៃតំបន់ហ្កាហ្សា ដោយចោទប្រកាន់អ៊ីស្រាអែលថា បានប្រើប្រាស់ការបង្អត់អាហារ ជាអាវុធនៃសង្គ្រាម។

ទីភ្នាក់ងារសារព័ត៌មានអារ៉ាប៊ីសាអ៊ូឌីត បានរាយការណ៍ថា លោកក៏បានថ្កោលទោសការពង្រីកកន្លែងតាំងទីលំនៅរបស់អ៊ីស្រាអែល ជាពិសេសនៅតំបន់ E1 នៃទីក្រុងហ្ស៊េរុយសាឡឹម និងការកំណត់គោលដៅទៅលើអ្នកសារព័ត៌មាន ដោយនិយាយថា សកម្មភាពបែបនេះ ទាមទារឲ្យមានការកាត់ទោសតាមច្បាប់ ក្រោមច្បាប់អន្តរជាតិ។

លោក Taha បាននិយាយថា៖«ឧក្រិដ្ឋកម្មសង្គ្រាមដ៏គួរឲ្យរន្ធត់»របស់អ៊ីស្រាអែលប្រឆាំងនឹងប្រជាជនប៉ាឡេស្ទីនទាមទារឲ្យមានការឆ្លើយតបជាអន្តរជាតិ ដែលមានប្រសិទ្ធភាពជាងមុន ដោយព្រមានថា ចេតនារបស់រដ្ឋាភិបាលអ៊ីស្រាអែល ក្នុងការគ្រប់គ្រងយោធាយ៉ាងពេញលេញលើតំបន់ហ្កាហ្សា និងបន្ត «ចក្ខុ  វិស័យអ៊ីស្រាអែលកាន់តែច្រើន» គឺជាការរំលោភលើច្បាប់អន្តរជាតិ។

កិច្ចប្រជុំនេះ ក៏បានលើកឡើងពីវិបត្តិមនុស្សធម៌ដែលកំពុងកើនឡើង នៅក្នុងតំបន់ហ្កាហ្សានេះ។