ភ្នាក់ងារព័ត៌មានស៊ីនហួរ បានរាយការណ៍ថា ប្រធានាធិបតីចិន លោក ស៊ី ជីនពីង (Xi Jinping) បានថ្លែងក្នុងអំឡុងកិច្ចប្រជុំមួយ ជាមួយប្រធានសភារុស្ស៊ី លោក Vyacheslav Volodin ថា ការរីកចម្រើនឥតឈប់ឈរនៃទំនាក់ទំនងរវាងប្រទេសចិន-រុស្ស៊ី គឺជាប្រភពនៃសន្តិភាពទូទាំងពិភពលោក។  

លោកបាននិយាយថា៖«ទំនាក់ទំនងរវាងចិន និងរុស្ស៊ី មានស្ថិរភាព ចាស់ទុំ និងសំខាន់ជាយុទ្ធសាស្ត្រ ក្នុងចំណោមទំនាក់ទំនងរវាងមហាអំណាចធំៗ នៅក្នុងពិភពលោកដែលមានការផ្លាស់ប្តូរ និងការប្រែប្រួល នាពេលបច្ចុប្បន្ននេះ។ ការលើកកម្ពស់ជាប់លាប់នៃការអភិវឌ្ឍកម្រិតខ្ពស់នៅក្នុងទំនាក់ទំនងចិន-រុស្ស៊ី ស្របតាមផលប្រយោជន៍ជាមូលដ្ឋានរបស់ប្រជាជននៃប្រទេសទាំងពីរ និងបម្រើជាប្រភពនៃស្ថិរភាពសម្រាប់សន្តិភាព នៅទូទាំងពិភពលោក»។

លោក ស៊ី ជីនពីង ក៏បានសង្កត់ធ្ងន់ថា កិច្ចសហប្រតិបត្តិការរវាងស្ថាប័ននីតិប្បញ្ញត្តិនៃប្រទេសចិន និងរុស្ស៊ី គឺជាផ្នែកសំខាន់មួយនៃភាពជាដៃគូយុទ្ធសាស្ត្រទ្វេភាគី។ ទីភ្នាក់ងារសារព័ត៌មានស៊ីនហួ បានដកស្រង់សម្តីមេដឹកនាំចិនរូបនេះដែលបានថ្លែងថា៖«កិច្ចសហប្រតិបត្តិការរវាងស្ថាប័ននីតិប្បញ្ញត្តិនៃប្រទេសចិន និងរុស្ស៊ីគឺជាធាតុផ្សំដែលមិនអាចកាត់ផ្តាច់បាននៃភាពជាដៃគូយុទ្ធសាស្ត្រទ្វេភាគីដ៏ទូលំទូលាយក្នុងយុគសម័យថ្មី ដោយមានសង្ឃឹមថា ភាគីទាំងពីរនឹងចូលរួមយ៉ាងសកម្ម ក្នុងការផ្លាស់ប្តូរបទពិសោធក្នុងផ្នែកអភិបាលកិច្ច និងបញ្ហានីតិបញ្ញត្តិ»។

លោក ស៊ី បានកត់សម្គាល់ឃើញថា ប្រទេសចិន និងរុស្ស៊ី គួរតែពង្រឹងការជឿទុកចិត្តគ្នាទៅវិញទៅមកជាយុទ្ធសាស្ត្រ និងការពារផលប្រយោជន៍របស់ប្រទេសទាំងពីរ ក្នុងវិស័យសន្តិសុខ។

មេដឹកនាំចិនរូបនេះ បានថ្លែងថា៖«ភាគីនានា គួរតែបន្តទំនាក់ទំនងមិត្តភាពជាប្រពៃណី ពង្រឹងការជឿទុកចិត្តគ្នាទៅវិញទៅមកជាយុទ្ធសាស្ត្រ ពង្រឹងការផ្លាស់ប្តូរ និងកិច្ចសហប្រតិបត្តិការលើគ្រប់វិស័យ រួមគ្នាការពារសន្តិសុខ និងផលប្រយោជន៍អភិវឌ្ឍន៍នៃប្រទេសទាំងពីរ បង្រួបបង្រួមប្រជាជាតិនៃតំបន់កំពុង   អភិវឌ្ឍន៍សកលខាងត្បូង ប្រកាន់ខ្ជាប់នូវវិធីសាស្រ្តពហុភាគីពិតប្រាកដ និងជំរុញវឌ្ឍនភាពនៃសណ្តាប់ធ្នាប់អន្តរជាតិ ក្នុងទិសដៅដ៏ត្រឹមត្រូវ និងសមហេតុផល»។