ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃចន្ទ ទី២៥ ខែសីហា ថា យោធាអាមេរិក អាចនឹងដាក់ពង្រាយទៅកាន់ទីក្រុងឈីកាហ្គោ ហើយក៏នឹងត្រៀមដើម្បីដាក់ពង្រាយទៅកាន់កន្លែងណាមួយផ្សេងទៀតតាមការជូនដំណឹង ដើម្បីបង្ក្រាបឧក្រិដ្ឋកម្ម។

ដោយលើកឡើងពីរលកនៃភាពគ្មានច្បាប់ដែលត្រូវបានអះអាង លោក Trump បានដណ្តើមការគ្រប់គ្រង កងកម្លាំងនគរបាលក្នុងខែនេះនៅក្នុងទីក្រុង Washington D.C. ហើយកំពុងអនុញ្ញាតឱ្យទាហានឆ្មាំជាតិកាន់អាវុធក្នុងពេលកំពុងល្បាតនៅទីក្រុង។ លោកបានគំរាមពង្រីកវត្តមានយោធារបស់អាមេរិកទៅកាន់ទីក្រុងនានាដែលគ្រប់គ្រងដោយគណបក្សប្រជាធិបតេយ្យដូចជាទីក្រុង Baltimore និងទីក្រុង Chicago។

អភិបាលរដ្ឋ Illinois លោក J.B. Pritzker បាននិយាយថា រដ្ឋរបស់លោកមិនបានស្នើសុំអន្តរាគមន៍ពីសហព័ន្ធទេ ហើយរដ្ឋអាជ្ញារដ្ឋ Illinois បាននិយាយថា វិធានការផ្លូវច្បាប់នឹងត្រូវធ្វើឡើងដើម្បីទប់ស្កាត់ការដាក់ពង្រាយរបស់សហព័ន្ធនៅក្នុងទីក្រុង Chicago ។

លោក Trump កាលពីថ្ងៃចន្ទ ក៏បានបញ្ជាឱ្យក្រសួងការពារជាតិធានាថាគ្រប់រដ្ឋទាំងអស់មានកងទ័ពឆ្មាំជាតិមួយចំនួនដែលត្រៀមជាស្រេចក្នុងការដាក់ពង្រាយឲ្យបានឆាប់រហ័សដើម្បីជួយបង្ក្រាបភាពចលាចលផ្នែកស៊ីវិល និងជួយដល់សុវត្ថិភាពសាធារណៈ។