ប្រទេសចិន បាននិយាយនៅថ្ងៃអង្គារថា ខ្លួនមានការរន្ធត់ចិត្តជាពន់ពេកចំពោះការវាយប្រហាររបស់អ៊ីស្រាអែលលើមន្ទីរពេទ្យមួយ នៅតំបន់ហ្កាហ្សា ដែលអ្នកសារព័ត៌មាន ៥នាក់ ស្ថិតក្នុងចំណោមមនុស្សយ៉ាងតិច ២០ នាក់ បានស្លាប់។

អ្នកនាំពាក្យក្រសួងការបរទេសលោក Guo Jiakun បាននិយាយនៅពេលសួរអំពីការវាយប្រហារនេះថា៖   «យើងមានការភ្ញាក់ផ្អើល និងថ្កោលទោសចំពោះការពិតដែលថា បុគ្គលិកពេទ្យ និងអ្នកកាសែត បានបាត់បង់ជីវិតជាអកុសលម្តងទៀត នៅក្នុងជម្លោះនេះ»។

«យើងសូមចូលរួមរំលែកទុក្ខដល់ជនរងគ្រោះ និងក្តីអាណិតអាសូរដល់ក្រុមគ្រួសាររបស់ពួកគេ»។

សារព័ត៌មានរ៉យទ័រ កាសែតAP និងទូរទស្សន៍ Al Jazeera ទាំងអស់ បានចេញសេចក្តីថ្លែងការណ៍កាន់ទុក្ខដល់បុគ្គលិករបស់ពួកគេដែលត្រូវបានសម្លាប់ ខណៈដែលយោធាអ៊ីស្រាអែល បាននិយាយថា ខ្លួននឹងស៊ើបអង្កេតលើឧប្បត្តិហេតុនេះ។

យោងតាមក្រុមអ្នកឃ្លាំមើលប្រព័ន្ធផ្សព្វផ្សាយ បានឲ្យដឹងថា សង្រ្គាមដែលកំពុងបន្តនៅតំបន់ហ្កាហ្សា គឺជាសង្គ្រាមមួយដែលបង្កឲ្យអ្នកសារព័ត៌មាន ស្លាប់ច្រើនបំផុត ដោយមានបុគ្គលិកប្រព័ន្ធផ្សព្វផ្សាយប្រហែល ២០០នាក់ ត្រូវបានសម្លាប់ ក្នុងការវាយលុករយៈពេលជិតពីរឆ្នាំរបស់អ៊ីស្រាអែល។