រដ្ឋបាលរបស់ប្រធានាធិបតីអាមេរិក លោក Donald Trump បានបង្ហាញពីផែនការអនុវត្តអត្រាពន្ធ ៥០ភាគរយលើផលិតផលពីប្រទេសឥណ្ឌា នៅក្នុងឯកសារព្រាងមួយដែលត្រូវបានចេញផ្សាយ កាលពីថ្ងៃចន្ទ (ទី២៥ ខែសីហា) ជាសញ្ញាចុងក្រោយបំផុតដែលសេតវិមានគ្រោងនឹងបន្តទៅមុខជាមួយនឹងកាតព្វកិច្ចពន្ធដ៏ខ្ពស់នេះ ខណៈដែលកិច្ចប្រឹងប្រែង ដើម្បីធ្វើជាអ្នកសម្របសម្រួលឲ្យមានកិច្ចព្រមព្រៀងសន្តិភាព រវាងរុស្ស៊ី និងអ៊ុយក្រែន ហាក់ដូចជាកំពុងជាប់គាំង។

ឯកសារសេចក្ដីជូនដំណឹងដែលចុះផ្សាយដោយក្រសួងសន្តិសុខមាតុភូមិ បានបង្ហាញថា ពន្ធដ៏ខ្ពស់នេះ នឹងអនុវត្តចំពោះផលិតផលឥណ្ឌា «ដែលត្រូវបានបញ្ចូលទៅក្នុងទីផ្សារ សម្រាប់ការប្រើប្រាស់ ឬដឹកចេញពីឃ្លាំង សម្រាប់ការប្រើប្រាស់ ឬក្រោយម៉ោង ១២:០១នាទីព្រឹក (ម៉ោងក្នុងស្រុក) នៅថ្ងៃទី២៧ ខែសីហា ឆ្នាំ២០២៥»។

គួរបញ្ជាក់ថា ប្រធានាធិបតីអាមេរិក លោក Donald Trump បានប្រកាសពីផែនការ កាលពីដើមខែសីហា ដើម្បីដំឡើងពន្ធទ្វេដងលើទំនិញឥណ្ឌា ពីកម្រិត ២៥ភាគរយ ទៅ ៥០ភាគរយ ជុំវិញការទិញប្រេងពីរុស្ស៊ី ដោយសង្ឃឹមថា នឹងដាក់សម្ពាធលើប្រធានាធិបតីរុស្ស៊ី លោក Vladimir Putin ឲ្យព្រមទៅកាន់តុចរចា ដើម្បីបញ្ចប់សង្គ្រាមលើអ៊ុយក្រែន។

រដ្ឋាភិបាលឥណ្ឌា បានចាត់ទុកអ្វីដែលត្រូវបានហៅថា ពន្ធបន្ថែមនេះថា ជាវិធានការអយុត្តិធម៌ ខណៈដែលសង្ឃឹមថា ការទម្លាយនូវភាពទាល់ច្រក តាមរយៈការចរចាសន្តិភាព អាចលុបចោលការតម្រូវឲ្យបង់ពន្ធដ៏ខ្ពស់ខ្លាំងនេះ៕