បាត់ដំបង៖ ព្រះអង្គម្ចាស់ នរោត្តម ចក្រាវុធ ព្រះប្រធានស្តីទីគណបក្សហ្វ៊ុនស៊ិនប៉ិច បានរំពឹងថា គណបក្សហ្វ៊ុនស៊ិនប៉ិច នឹងមានសំឡេងគាំទ្រច្រើនឡើងវិញ នៅក្នុងឱកាសបោះឆ្នោតក្រុមប្រឹក្សាឃុំសង្កាត់ នៅឆ្នាំ២០២២ និងការបោះឆ្នោតសកលនាឆ្នាំ២០២៣ខាងមុខនេះ ខណៈការអះអាងបែបនេះរបស់ព្រះអង្គ បន្ទាប់ពីមើលឃើញសមាជិក-សមាជិកានៅតាមខេត្តមួយចំនួនមានការសាមគ្គីគ្នាបានល្អប្រសើនោះ។
ថ្លែងប្រាប់ទូរទស្សន៍ BTV បន្ទាប់ពីចុះសំណេះសំណាល ជាមួយសមាជិក-សមាជិក នៅខេត្ត សៀមរាប បន្ទាយមានជ័យ និងខេត្តបាត់ដំបង នាថ្ងៃទី១៨ និង១៩ ខែមករា ឆ្នាំ២០២២នេះ ព្រះអង្គម្ចាស់ នរោត្តម ចក្រាវុធ បានមានបន្ទូលថា តាមរយៈការចុះមូលដ្ឋានព្រះអង្គបានមើលឃើញដល់ សមាជិក-សមាជិកាគណបក្សហ្វ៊ុនស៊ិនប៉ិចមានការស្រុះស្រួលគ្នាសាមគ្គីគ្នា ។
ក្នុងឱកាសយាងសំណេះសំណេះនោះដែរ ព្រះអង្គម្ចាស់ នរោត្តម ចក្រាវុធ ក៏បានមានបន្ទូលផង ដែររថាគណបក្សហ្វ៊ុនស៊ិនប៉ិច ក្រោមការដឹកនាំរបស់ព្រះអង្គផ្ទាល់ នៅតែបើកទ្វារចំហជានិច្ច ក្នុងការទទួលយកនូវអ្នកគាំទ្រ ហើយសូមឲ្យសមាជិក សមាជិកា និងអ្នកគាំទ្រ ធ្លាប់បោះឆ្នោតថ្វាយសម្ដេចក្រុមព្រះទាំងអស់ សូមរួបរួមគ្នាឡើងវិញ គប្បីបញ្ឈប់ការលាបពណ័គ្នាបន្តទៀតជាដើម។
ព្រះអង្គម្ចាស់ ក៏បន្តអំពាវនាវទៅកាន់សមាជិក សមាជិកាបក្ស ដែលជារចនាសម្ព័ន្ធ ត្រូវធ្វើការកៀរគរ និងប្រមែប្រមូលអ្នករាជានិយម ដើម្បីបន្តគាំទ្រគណបក្សហ្វ៊ុនស៊ិនប៉ិច៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
