លោក Donald Trump បាននិយាយថា និស្សិតចិនចំនួន ៦០០.០០០នាក់ នឹងត្រូវបានអនុញ្ញាតឲ្យចូលសហរដ្ឋអាមេរិក ដើម្បីសិក្សា នៅមហាវិទ្យាល័យ អំឡុងកិច្ចពិភាក្សាពាណិជ្ជកម្មដែលកំពុងបន្តមានជាមួយប្រទេសចិន។

ក្នុងអំឡុងពេលថ្លែងនៅឯសេតវិមាន កាលពីថ្ងៃចន្ទ (ទី២៥ ខែសីហា) សេចក្តីប្រកាសរបស់ប្រធានាធិបតីបានបង្ហាញពីលទ្ធភាពនៃការផ្សះផ្សា ក្នុងទំនាក់ទំនង រវាងសហរដ្ឋអាមេរិក និងចិន បន្ទាប់ពីមានការដំឡើងពន្ធខ្ពស់ និងការរឹតបន្តឹងលើនិស្សិតចិន។

លោក Trump បានប្រាប់អ្នកសារព័ត៌មានថា៖ «ខ្ញុំឮរឿងរ៉ាវជាច្រើនដែលយើងនឹងមិនអនុញ្ញាតឲ្យនិស្សិតរបស់ពួកគេចូលមកសិក្សា»។ លោកបានបន្ថែមថា៖ «យើងនឹងអនុញ្ញាតឲ្យសិស្សរបស់ពួកគេចូលមកសិក្សាធម្មតា។ វាមានសារៈសំខាន់ខ្លាំងណាស់ ដោយមានសិស្សចំនួន ៦០០.០០០នាក់។ វាពិតជាមានសារៈសំខាន់ណាស់។ ហើយយើងនឹងមានទំនាក់ទំនងល្អជាមួយប្រទេសចិន»។

ការផ្តល់ជូនទិដ្ឋាការដល់សិស្សរបស់លោក Trump កើតមានឡើងស្របពេលដែលមានកិច្ចពិភាក្សាពាណិជ្ជកម្មជាមួយរដ្ឋាភិបាលចិន។ កាលពីដើមឆ្នាំនេះ រដ្ឋបាលរបស់លោក បានដាក់អត្រាពន្ធ ១៤៥ភាគរយលើទំនិញទាំងអស់របស់ចិន ដែលជំរុញឲ្យទីក្រុងប៉េកាំងសងសឹកវិញជាមួយនឹងការយកពន្ធ ១២៥ភាគរយលើការនាំចេញរបស់សហរដ្ឋអាមេរិក។

ក្រុមអ្នកចរចានៃប្រទេសទាំង២ នៅទីក្រុងហ្សឺណែវ ប្រទេសស្វីស បានយល់ព្រមក្នុងខែឧសភា ដើម្បីផ្អាកដំឡើងពន្ធបន្ថែម ប៉ុន្តែលោក Trump បានបន្តព្រមានអំពីការមានវិធានការពន្ធបន្ថែម។ កាលពីសប្តាហ៍មុន លោកបានដំឡើងពន្ធ ២០០ភាគរយ លើមេដែកដែលផលិតដោយចិន ដោយលើកឡើងពីអ្វីដែលលោកបានពិពណ៌នាថា ជា «ភាពផ្តាច់មុខ» របស់ទីក្រុងប៉េកាំងលើទីផ្សារពិភពលោក។ តែយ៉ាងណាក្ដី លោក Trump បានប្រាប់អ្នកសារព័ត៌មានថា៖ «ខ្ញុំមិនគិតថា យើងនឹងមានបញ្ហាជាមួយវិធានការនោះទេ»។

បច្ចុប្បន្ននេះ និស្សិតចិនប្រហែល ២៧០.០០០នាក់ បានចុះឈ្មោះចូលរៀនក្នុងសកលវិទ្យាល័យ នៅសហរដ្ឋអាមេរិក៕