អង្គការលើកលែងទោសអន្តរជាតិ (Amnesty International ) នៅថ្ងៃអង្គារ (ទី២៦ ខែសីហា)នេះ បានលើកឡើងថា ការបំផ្លិចបំផ្លាញយ៉ាងទូលំទូលាយរបស់កងទ័ពអ៊ីស្រាអែលលើទ្រព្យសម្បត្តិជនស៊ីវិល នៅភាគខាងត្បូងនៃប្រទេសលីបង់ ក្នុងនោះរួមទាំងការវាយប្រហារបន្ទាប់ពីបានឈានដល់បទឈប់បាញ់ជាមួយក្រុមហេសបូឡាផងដែរនោះ គួរតែត្រូវបានស៊ើបអង្កេតជាឧក្រិដ្ឋកម្មសង្គ្រាម។

បទឈប់បាញ់កាលពីថ្ងៃទី២៧ ខែវិច្ឆិកា ភាគច្រើនបានបញ្ចប់អរិភាពអស់រយៈពេលជាង ១ឆ្នាំ រវាងអ៊ីស្រាអែល និងក្រុមហេសបូឡា ដែលរួមទាំងបិទបញ្ចប់សង្រ្គាមបើកចំហរយៈពេល ២ខែ ជាពេលដែលអ៊ីស្រាអែលបានបញ្ជូនកងទ័ពជើងគោកចូលទៅ និងបើកយុទ្ធនាការទម្លាក់គ្រាប់បែកដ៏ធំមួយ នៅលីបង់។

Amnesty បានឲ្យដឹងនៅក្នុងសេចក្តីថ្លែងការណ៍មួយថា៖ «ការបំផ្លិចបំផ្លាញយ៉ាងទូលំទូលាយ និងដោយមានចេតនារបស់យោធាអ៊ីស្រាអែល លើទ្រព្យសម្បត្តិស៊ីវិល និងដីកសិកម្ម នៅទូទាំងភាគខាងត្បូងនៃប្រទេសលីបង់ ត្រូវតែត្រូវបានស៊ើបអង្កេតជាឧក្រិដ្ឋកម្មសង្គ្រាម»។

លោកស្រី Erika Guevara Rosas នៃក្រុមសិទ្ធិមនុស្សមួយនេះ បានលើកឡើងនៅក្នុងសេចក្តីថ្លែងការណ៍ថា ការបំផ្លិចបំផ្លាញបាន «ធ្វើឲ្យតំបន់ទាំងមូលមិនអាចរស់នៅបាន និងបង្កឲ្យមានការបាត់បង់អាយុជីវិតរាប់មិនអស់»។

អ៊ីស្រាអែលបានបញ្ជាក់មករហូតថា សកម្មភាពយោធារបស់ខ្លួន បានផ្តោតលើទីតាំង និងប្រតិបត្តិការរបស់ក្រុមហេសបូឡា ហើយខ្លួននៅតែបន្តវាយប្រហារប្រទេសលីបង់ បើទោះបីជាមានបទឈប់បាញ់ក៏ដោយ៕