អធិការបតីអាល្លឺម៉ង់ លោក Friedrich Merz នៅថ្ងៃអង្គារ (ទី២៦ ខែសីហា) នេះ បានប្រាប់ឲ្យដឹងថា ប្រទេសអាល្លឺម៉ង់នឹងមិនចូលរួមជាមួយគំនិតផ្តួចផ្តើមរបស់សម្ព័ន្ធមិត្តលោកខាងលិច ក្នុងការទទួលស្គាល់រដ្ឋប៉ាឡេស្ទីន នៅឯមហាសន្និបាតអង្គការសហប្រជាជាតិ (UN) នាខែក្រោយនោះឡើយ។

លោក Merz កំពុងនិយាយនៅឯសន្និសីទសារព័ត៌មានរួមគ្នាជាមួយនាយករដ្ឋមន្ត្រីកាណាដា លោក Mark Carney ដែលបាននិយាយកាលពីខែមុនថា ប្រទេសកាណាដាគ្រោងនឹងទទួលស្គាល់រដ្ឋប៉ាឡេស្ទីននៅឯមហាសន្និបាតនោះ បន្ទាប់ពីមានការប្រកាសស្រដៀងគ្នាដោយបារាំង និងអង់គ្លេស។

លោក Merz បានបញ្ជាក់ថា៖ «ជំហររបស់រដ្ឋាភិបាលសហព័ន្ធ គឺច្បាស់លាស់ ពាក់ព័ន្ធនឹងលទ្ធភាពទទួលស្គាល់រដ្ឋប៉ាឡេស្ទីន ដែលជារឿងគួរឲ្យព្រួយបារម្ភ។ កាណាដាដឹងពីការសម្រេចនេះ។ យើងនឹងមិនចូលរួមជាមួយគំនិតផ្តួចផ្តើមនេះទេ។ យើងមើលមិនឃើញលក្ខខណ្ឌនានាត្រូវបានបំពេញនោះឡើយ»៕