រដ្ឋមន្ត្រីរដ្ឋាភិបាលមួយរូប នៅថ្ងៃអង្គារ (ទី២៦ ខែសីហា) នេះ បានលើកឡើងថា ប្រទេសបារាំងអាចមើលឃើញខ្លួនកំពុងឆ្ពោះទៅកាន់ការបោះឆ្នោតមុនអាណត្តិមួយទៀត បន្ទាប់ពីគណបក្សប្រឆាំង បានប្រាប់ថា ពួកគេនឹងបោះឆ្នោតទម្លាក់នាយករដ្ឋមន្ត្រី លោក Francois Bayrou និងខណៈដែលទីផ្សារបារាំងបានដាំក្បាលចុះ។

កាលពីថ្ងៃចន្ទ លោក Bayrou បានធ្វើឲ្យស្ថាប័ននយោបាយរង្គោះរង្គើ បន្ទាប់ពីស្ងប់ស្ងាត់ក្នុងអំឡុងពេលសម្រាករដូវក្តៅ ដោយមាននូវចំណាត់ការដ៏គួរឲ្យភ្ញាក់ផ្អើល ក្នុងការស្វែងរកនូវការបោះឆ្នោតផ្ដល់ទំនុកចិត្តនៅថ្ងៃទី៨ ខែកញ្ញា ជុំវិញផែនការកាត់បន្ថយបំណុលរបស់លោក។

ហើយភ្លាមៗ គណបក្សប្រឆាំងសំខាន់ៗរបស់ប្រទេសនេះ បានបង្ហាញពីគោលជំហរយ៉ាងច្បាស់លាស់ថា ពួកគេនឹងបោះឆ្នោតប្រឆាំងនឹងរូបលោក និងរដ្ឋាភិបាលសំឡេងភាគតិចរបស់លោក។ អ្នកដឹកនាំសមាជិកសភាខាងក្រុមសង្គមនិយម គឺលោក Boris Vallaud បានសរសេរនៅលើបណ្ដាញសង្គម X ថា៖ «យើងត្រូវការនាយករដ្ឋមន្ត្រីផ្សេង ហើយសំខាន់ជាងនេះទៅទៀត មានគោលនយោបាយខុសគ្នា»។

រដ្ឋមន្ត្រីក្រសួងហិរញ្ញវត្ថុ លោក Eric Lombard បាននិយាយថា រដ្ឋាភិបាលនៅតែសង្ឃឹមថា នឹងឈានដល់កិច្ចព្រមព្រៀងចុងក្រោយជាមួយគណបក្សប្រឆាំង ប៉ុន្តែចាប់ពីក្រុមស្តាំនិយមជ្រុល ទៅកាន់ក្រុមប្រកាន់ឆ្វេងរឹងត្អឹង បណ្ដាមេដឹកនាំនៃគណបក្សទាំងនោះ បានបញ្ជាក់យ៉ាងច្បាស់ថា ការគាំទ្រទំនងជាមិនកើតឡើងនោះទេ។

ហើយលោក Jean-Luc Melenchon មកពីគណបក្សប្រកាន់ឆ្វេងតឹងរ៉ឹង France Unbowed រឹតតែទៅកាន់តែឆា្ងយទៀត ដោយបាននិយាយថា លោកប្រធានាធិបតី Emmanuel Macron ផ្ទាល់ គួរតែចុះចេញ។

រដ្ឋមន្ត្រីក្រសួងយុត្តិធម៌ លោក Gerald Darmanin បានប្រាប់ទូរទស្សន៍ France 2 ថា បើទោះបីជារដ្ឋាភិបាលនៅតែកំពុងធ្វើការ ដើម្បីព្យាយាមស្វែងរកកិច្ចព្រមព្រៀងដ៏ស្រុះស្រួលមួយក៏ដោយ ក៏រូបលោក «មិនអាចច្រានចោល» បាននោះដែរនូវសេណារីយ៉ូនៃការរំលាយសភាមួយផ្សេងទៀតនោះឡើយ៕