ស្របពេលដែលរលកថ្មីនៃព្យុះភ្លៀង ភ្លៀងវស្សា និងទឹកជំនន់បណ្តាលឲ្យកើតមានភាពវឹកវរនៅទូទាំងប៉ាគីស្ថាន លោក Iqbal Solangi គឺជាកសិករមួយរូបអង្គុយនៅក្នុងខ្ទមកំសត់របស់លោកស្ថិតក្នុងទីក្រុងតំបន់ឆ្នេរភាគខាងត្បូង Karachi យល់ពីអារម្មណ៍ឈឺចាប់របស់អ្នកដែលបាត់បង់មនុស្សជាទីស្រលាញ់របស់ពួកគេ ដីស្រែចម្ការ និងសត្វចិញ្ចឹមរបស់ពួកគេ ។

ចាប់តាំងពីចុងខែមិថុនារហូតមក ភ្លៀងធ្លាក់ខ្លាំងខុសពីធម្មតាបង្កឲ្យមានទឹកជំនន់ និងបំណាក់ដី បានសម្លាប់មនុស្សជាង ៨០០នាក់ ធ្វើឲ្យខូចខាតផ្ទះសម្បែងប្រជាពលរដ្ឋយ៉ាងហោច ៧.២២៥ខ្នង និងបានហូរនាំយកទៅសត្វចិញ្ចឹមជាង ៥.៥០០ក្បាល បន្ថែមពីលើការខូចខាតផលដំណាំនៅទូទាំងប្រទេសប៉ាគីស្ថាន ។

ស្របពេលដែលមូលហេតុពិតប្រាកដនៃទឹកជំនន់ នៅពុំទាន់ត្រូវបានកំណត់ កត្តាជាច្រើនអាចរួមផ្សំនៅក្នុងការជន់លិចនេះ រួមទាំងបញ្ហាបម្រែបម្រួលអាកាសធាតុផងដែរ ។

ប៉ាគីស្ថានស្ថិតក្នុងចំណោមប្រទេសចំនួន ១០ដែលងាយរងគ្រោះបំផុតដោយសារអាកាសធាតុ ប៉ុន្តែប្រទេសមួយនេះ រួមចំណែកតិចជាង ១ភាគរយប៉ុណ្ណោះនៃការបំភាយឧស្ម័នសកល ។

លោក Solangi បានបញ្ចប់ការនិរទេសកសិកម្មបង្កឡើងដោយបម្រែបម្រួលអាកសធាតុរបស់លោកកាលពីឆ្នាំ ២០២២ ប៉ុន្តែលោកធ្លាប់បាត់បង់ដំណាំស្រូវរបស់លោកដោយសារទឹកជំនន់ជាលើកទី ៣ ក្រោយទឹកជំនន់ឆ្នាំ ២០១០ និងឆ្នាំ ២០១២ ហើយឥឡូវលោកជាប់បំណុលច្រើនណាស់ ។

នៅឆ្នាំ ២០១២ លោកបានផ្លាស់ទីលំនៅចេញពីភូមិតូចមួយស្ថិតនៅតាមព្រំដែនខេត្ត Sindh និងខេត្ត Balochistan ទៅកាន់ទីក្រុង Karachi ដោយសារតែបម្រែបម្រួលអាកាសធាតុ ។ ការបំលាស់ទីលំនៅនេះ បានបញ្ចប់ការធ្វើកសិកម្មរយៈពេល ៣ទសវត្សរ៍របស់គ្រួសារលោក ។

ពាក់ព័ន្ធនឹងទឹកជំនន់ឆ្នាំ ២០២២ ដែលធ្វើឲ្យប៉ះពាល់ដល់ពលរដ្ឋ ៣៣លាននាក់ និងជន់លិចដីកសិកម្ម ៤លានហិចតា លោក Solangi និយាយថា ពេលដែលផ្ទះរបស់លោក និងដីរបស់លោករងការជន់លិច លោកបានត្រឹមតែអង្គុយមើលទឹកហូរនាំយកវាទៅប៉ុណ្ណោះ ហើយលោកបានសម្រេចចិត្តថា លោកនឹងមិនវិលត្រឡប់មកវិញនោះទេ ៕