អ្នកនាំពាក្យយោធាអ៊ីស្រាអែល បានបញ្ជាក់កាលពីថ្ងៃអង្គារ (២៦ សីហា) ថា អ្នករាយការណ៍ព័ត៌មានពីរនាក់របស់សារព័ត៌មានរ៉យទ័រ និង Associated Press (ហៅកាត់ថា AP) ដែលត្រូវបានសម្លាប់ក្នុងការវាយប្រហាររបស់អ៊ីស្រាអែល លើមន្ទីរពេទ្យតំបន់ហ្កាហ្សា មិនមែនជា "គោលដៅនៃការវាយប្រហារនោះទេ" ហើយថា ប្រមុខទ័ពអ៊ីស្រាអែល បញ្ជាឱ្យស៊ើបអង្កេតបន្ថែមទៀតទៅលើថា តើការសម្រេចចិត្តវាយប្រហារមន្ទីរពេទ្យនោះត្រូវធ្វើឡើងយ៉ាងដូចម្ដេច។

គួរឱ្យដឹងថា កងកម្លាំងអ៊ីស្រាអែល បានវាយប្រហារមន្ទីរពេទ្យ Nasser នៅភាគខាងត្បូងហ្កាហ្សាស្រ្ទីប កាលពីថ្ងៃចន្ទ ដោយសម្លាប់មនុស្សយ៉ាងតិច ២០នាក់ រួមទាំងអ្នកកាសែត ៥នាក់ ដែលធ្វើការឱ្យរ៉យទ័រ, AP, Al Jazeera និងស្ថាប័នព័ត៌មានផ្សេងទៀត។

អ្នកនាំពាក្យយោធាអ៊ីស្រាអែល លោក Nadav Shoshani បានលើកឡើងថា "អ៊ីស្រាអែលអាចបញ្ជាក់បានថា អ្នកកាសែតរ៉យទ័រ និង AP មិនមែនជាគោលដៅវាយប្រហារនោះទេ"។ ចំណែកអ្នកកាសែត ៣នាក់ទៀត ដែលស្លាប់ក្នុងការវាយប្រហារដូចគ្នានោះ មិនទាន់ត្រូវបានបកស្រាយ ឬបញ្ជាក់ដោយអ៊ីស្រាអែលនោះទេ។

ពុំមាននរណាម្នាក់ក្នុងចំណោមអ្នកកាសែតទាំង ៥នាក់នោះ ស្ថិតក្នុងគោលដៅសង្ស័យថាជាសកម្មប្រយុទ្ធប៉ាឡេស្ទីនទាំង ៦នាក់ឡើយ ដែលយោធាអ៊ីស្រាអែលដាក់ឈ្មោះក្នុងសេចក្តីថ្លែងការណ៍ជាលាយលក្ខណ៍អក្សរចេញផ្សាយកាលពីថ្ងៃអង្គារ។ ការិយាល័យនាយករដ្ឋមន្ត្រីអ៊ីស្រាអែល Benjamin Netanyahu បាននិយាយកាលពីថ្ងៃចន្ទថា អ៊ីស្រាអែល មានការសោកស្តាយយ៉ាងខ្លាំងចំពោះអ្វីដែលលោកហៅថាជា "ឧប្បត្តិហេតុដ៏សោកនាដកម្ម"៕