ប្រេសិតពិសេសរបស់សហរដ្ឋអាមេរិក លោក Steve Witkoff បាននិយាយកាលពីថ្ងៃអង្គារ (២៦ សីហា) ថា លោកនឹងជួបជាមួយអ្នកតំណាងមកពីអ៊ុយក្រែន នៅទីក្រុងញូវយ៉ក ក្នុងសប្តាហ៍នេះ ហើយថា ទីក្រុងវ៉ាស៊ីនតោនក៏នៅតែបន្តពិភាក្សាជាមួយរុស្ស៊ីផងដែរ ខណៈសហរដ្ឋអាមេរិក កំពុងស្វះស្វែងបញ្ចប់សង្រ្គាមរុស្ស៊ី នៅអ៊ុយក្រែន ឱ្យបានឆាប់។

ថ្លែងនៅក្នុងកម្មវិធីទូរទស្សន៍ Fox News លោក Witkoff បាននិយាយថា "រូបលោកកំពុងត្រៀមជួបជាមួយភាគីអ៊ុយក្រែន នៅសប្តាហ៍នេះ ធ្វើនៅទីក្រុងញូវយ៉ក ហើយនោះជាសញ្ញាដ៏ធំមួយ ចំណែកកិច្ចពិភាក្សាជាមួយភាគីរុស្ស៊ី ក៏បន្តធ្វើឡើងរៀងរាល់ថ្ងៃដែរ"។ ប្រេសិតអាមេរិករូបនេះបានប្រាប់ពីគំនិតផ្ទាល់ខ្លួនរបស់លោកថា ប្រធានាធិបតីរុស្ស៊ី លោក Vladimir Putin ចង់បញ្ចប់សង្រ្គាមមួយនេះ។

នៅក្រោមកិច្ចប្រឹងប្រែងនាំយកសន្តិភាពឱ្យអ៊ុយក្រែន លោកប្រធានាធិបតីអាមេរិក Donald Trump បានរៀបចំកិច្ចប្រជុំកំពូលជាមួយលោក Putin ក្នុងរដ្ឋអាឡាស្កា នៅថ្ងៃទី១៥ ខែសីហា និងកិច្ចប្រជុំជាមួយប្រធានាធិបតីអ៊ុយក្រែន លោក Volodymyr Zelenskiy ក៏ដូចជាមេដឹកនាំអង្គការណាតូ និងអឺរ៉ុបនៅសេតវិមាន កាលពីថ្ងៃទី១៨ ខែសីហា។ លោក Trump បានប្តេជ្ញាបញ្ចប់សង្រ្គាមរបស់រុស្ស៊ីនៅអ៊ុយក្រែនឱ្យបានឆាប់រហ័ស នៅពេលលោកចូលកាន់តំណែងក្នុងខែមករា ប៉ុន្តែគោលបំណងសន្តិភាពមួយនេះមិនទាន់សម្រេចនៅឡើយទេ៕