អ្នកនាំពាក្យអគ្គលេខាធិការអង្គការសហប្រជាជាតិបានបញ្ជាក់ក្នុងសប្តាហ៍នេះថា អង្គការសហប្រជាជាតិបានបញ្ចេញមូលនិធិសង្គ្រោះបន្ទាន់ចំនួន ៦០ម៉ឺនដុល្លារ សម្រាប់ប្រទេសប៉ាគីស្ថាន ខណៈ ចំនួនអ្នកស្លាប់ដោយសារភ្លៀងធ្លាក់ខ្លាំងបណ្ដាលមកពីរដូវមូសុង និងទឹកជំនន់នៅទូទាំងប្រទេសបានកើនឡើងដល់ជាង៨០០នាក់។

ក្រុមមន្ត្រីបាននិយាយកាលពីថ្ងៃអង្គារសប្ដាហ៍នេះថា ប្រទេសប៉ាគីស្ថានបានជម្លៀសមនុស្សយ៉ាងហោចណាស់ ១៥ម៉ឺននាក់ នៅតាមតំបន់ជាប់ដងទន្លេចំនួន ៣ ក្នុងតំបន់បេះដូងកសិកម្មរបស់ប្រទេសនេះ ដើម្បីគេចពីទឹកជំនន់ ខណៈប្រទេសជិតខាងឥណ្ឌាបានព្រមានថា ខ្លួនគ្រោងបញ្ចេញទឹក ពីទំនប់ ដែលតែងតែបញ្ចេញតាមទម្លាប់នៅពេលទឹកឡើងខ្ពស់ហួសទំនប់។



មន្ត្រីប៉ាគីស្ថានបាននិយាយថា ពួកគេបានទទួលការព្រមានជាលើកទីពីរពីប្រទេសឥណ្ឌាកាលពីថ្ងៃទី ២៥ ខែសីហាថា ខ្លួនមានបំណងបញ្ចេញទឹកចេញពីទំនប់ Madhopur ដែលឡើងពេញយ៉ាងឆាប់រហ័សនៅផ្នែកម្ខាងនៃខេត្ត Punjab ។

ភ្លៀងមូសុងបានធ្វើឱ្យមានការបំផ្លិចបំផ្លាញពាសពេញប្រទេសប៉ាគីស្ថាន បំផ្លាញដំណាំ សម្លាប់សត្វពាហនៈ និងបំផ្លាញផ្ទះសម្បែងរាប់ពាន់ខ្នងនៅក្នុងប្រទេសនេះ។ ក្រុមអាជ្ញាធរគ្រប់គ្រងគ្រោះមហន្តរាយជាតិប៉ាគីស្ថាន (NDMA) បានរាយការណ៍ថាមនុស្ស ៨០២នាក់បានស្លាប់ដោយសារភ្លៀងរដូវ   មូសុង និងទឹកជំនន់ ចាប់តាំងពីថ្ងៃទី ២៦ ខែមិថុនា និង១.០៨៨ នាក់រងរបួស។  

ភ្លៀងនៅតែបន្តវាយលុកផ្នែកជាច្រើននៃប្រទេសនេះ ជាពិសេសខេត្តភាគខាងកើត Punjab ដែលជាខេត្តមានប្រជាជនច្រើនជាងគេបំផុត ជាទីដែលការកើនឡើងកម្រិតទឹកនៅក្នុងទន្លេ Sutlej និងទន្លេ Ravi បានជំរុញឱ្យអាជ្ញាធរជម្លៀសមនុស្សជាង១៧០.០០០នាក់ចេញពីតំបន់ងាយរងគ្រោះនានា៕