ប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃពុធ (២៧ សីហា) នេះ បានរិះគន់ខ្លាំងៗលើប្រធានាធិបតីកូរ៉េខាងត្បូង លោក Lee Jae Myung ជុំវិញសុន្ទរកថារបស់លោកស្តីពីការរំសាយអាវុធនុយក្លេអ៊ែរនៅឧបទ្វីបកូរ៉េ អំឡុងទស្សនកិច្ចទៅកាន់សហរដ្ឋអាមេរិក ក្នុងសប្តាហ៍នេះ។

គួរឱ្យដឹងថា លោក Lee បានថ្លែងនៅមជ្ឈមណ្ឌលសម្រាប់ការសិក្សាយុទ្ធសាស្ត្រ និងអន្តរជាតិនៅទីក្រុងវ៉ាស៊ីនតោន កាលពីថ្ងៃចន្ទថា៖ "សម្ព័ន្ធភាពកូរ៉េខាងត្បូង-អាមេរិក នឹងត្រូវធ្វើឱ្យប្រសើរឡើងដល់កម្រិតសកលលើសពីឧបទ្វីបកូរ៉េ នៅពេលដែលមានផ្លូវសម្រាប់ការរំសាយអាវុធនុយក្លេអ៊ែរ សន្តិភាព និងសន្តិសហវិជ្ជមាន (ឬការរួមរស់ជាមួយគ្នាដោយសន្តិភាព) នៅលើឧបទ្វីបកូរ៉េ"។

KCNA បានរិះគន់ថា "លោក Lee សម្ដែងដូចជាមានឆន្ទៈស្តារទំនាក់ទំនង" រវាងកូរ៉េទាំងពីរ ប៉ុន្តែក៏ "បានបង្ហាញខ្លួនឯងថាជាបុគ្គលដ៏កម្រោលក្នុងការប្រឈមមុខដាក់គ្នា" និងជា "មនុស្សពុតត្បុត"។ KCNA បន្តថា "ឋានៈរបស់កូរ៉េខាងជើងជាមហាអំណាចនុយក្លេអ៊ែរ ជាជម្រើសមិនអាចជៀសវាងបាន ដែលឆ្លុះបញ្ចាំងយ៉ាងត្រឹមត្រូវនូវការគំរាមកំហែងអរិភាពពីខាងក្រៅ និងការផ្លាស់ប្តូរក្នុងរចនាសម្ព័ន្ធកងកម្លាំងសន្តិសុខពិភពលោក"។

ចាប់តាំងពីលោក Lee ឈ្នះការបោះឆ្នោតជាប្រធានាធិបតីកូរ៉េខាងត្បូងថ្មីក្នុងខែមិថុនាមក រដ្ឋាភិបាលរបស់លោក បានចាត់វិធានការជាច្រើនក្នុងគោលបំណងបន្ធូរភាពតានតឹងរវាងកូរ៉េទាំងពីរ ដូចជាការដកឧបករណ៍បំពងសំឡេងប្រឆាំងកូរ៉េខាងជើង និងបញ្ជាឱ្យពិភាក្សាលើការស្ដារឡើងវិញនូវកិច្ចព្រមព្រៀងអតីតកាលមួយចំនួនរវាងកូរ៉េទាំងពីរជាដើម៕