រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent បាននិយាយកាលពីថ្ងៃអង្គារ (២៦ សីហា) ថា ប្រាក់ចំណូលពីពន្ធគយរបស់ប្រធានាធិបតី លោក Donald Trump អាចនឹងកើនឡើងលើសពី ៥០០ពាន់លានដុល្លារ ក្នុងមួយឆ្នាំ ជាមួយនឹងកំណើនយ៉ាងគំហុកនៃចំណូលពន្ធខែកក្កដា ដល់ខែសីហា ហើយទំនងជាកើនឡើងកាន់តែច្រើនថែមទៀតក្នុងខែកញ្ញា។

លោក Bessent បានប្រាប់កិច្ចប្រជុំគណៈរដ្ឋមន្ត្រីរបស់សេតវិមានថា ការប៉ាន់ប្រមាណពីមុនរបស់លោក ដែលថាការប្រមូលពន្ធប្រចាំឆ្នាំមានត្រឹម ៣០០ពាន់លានដុល្លារ គឺទាបពេកហើយ។

លោក Bessent បាននិយាយថា "មានការហក់ឡើងយ៉ាងខ្លាំងក្នុងចំណូលពីខែកក្កដា ដល់ខែសីហា ហើយអាចនឹងឃើញតួលេខកាន់តែធំពីខែសីហា ដល់ខែកញ្ញា"។ លោកបន្តថា៖ ចំណូលកំពុងនៅលើផ្លូវតម្រង់ទៅកន្លះសែនកោដិដុល្លារ ឬស្មើនឹង ៥០០ពាន់លានដុល្លារ ហើយប្រហែលជាឆ្ពោះទៅរកតួលេខ ១សែនកោដិដុល្លារផងដែរ»។

ក្រសួងរតនាគារអាមេរិកបានរាយការណ៍កាលពីថ្ងៃចន្ទសប្ដាហ៍នេះថា គិតត្រឹមថ្ងៃទី២២ ខែសីហា រដ្ឋាភិបាលបានប្រមូលចំណូលពន្ធគយ និងពន្ធដាររួមបញ្ចូលគ្នាចំនួន ២៩,៦ពាន់លានដុល្លារ រហូតមកដល់ពេលនេះក្នុងអំឡុងខែសីហា ដែលត្រូវនឹងចំនួនសរុបរបស់ខ្លួនសម្រាប់ពេញមួយខែកក្កដា៕