អូស្ត្រាលីនៅថ្ងៃពុធ ២៧ សីហា សប្ដាហ៍នេះ បានច្រានចោលការលើកឡើងរបស់អ៊ីស្រាអែលដែលថា អន្តរាគមន៍របស់ខ្លួនបានជំរុញឱ្យទីក្រុងកង់បេរ៉ា បណ្តេញឯកអគ្គរដ្ឋទូតអ៊ីរ៉ង់ចេញ ខណៈខ្លួនបានស្តីបន្ទោសទីក្រុងតេអេរ៉ង់ សម្រាប់ការដឹកនាំឲ្យមានការវាយប្រហារបែបស្អប់ខ្ពើមលើជនជាតិជ្វីហ្វ យ៉ាងហោចណាស់ពីរលើកក្នុងទីក្រុងធំៗរបស់ប្រទេសនេះ ដូចជានៅ ស៊ីដនី និងមែលប៊ន។

រដ្ឋមន្ត្រីក្រសួងមហាផ្ទៃ លោក Tony Burke បានប្រាប់វិទ្យុ ABC នៅពេលសួរអំពីប្រទេសអ៊ីស្រាអែលដែលអះអាងយកមុខមាត់សម្រាប់ការសម្រេចចិត្តរបស់អូស្ត្រាលីក្នុងការបញ្ជាឱ្យឯកអគ្គរដ្ឋទូតរបស់អ៊ីរ៉ង់ លោក Ahmad Sadeghi ចាកចេញពីប្រទេសអូស្ត្រាលី ថា ជាការអះអាងគ្មានន័យទាល់តែសោះ។ពួកលោកចាប់ផ្តើមធ្វើការតាមរយៈអ្វីដែលពួកលោកនឹងធ្វើជាការឆ្លើយតប ដោយមិនចាំបាច់មានការណែនាំឡើយ។  

អ្នកនាំពាក្យរដ្ឋាភិបាលអ៊ីស្រាអែល លោក David Mencer បាននិយាយកាលពីថ្ងៃអង្គារថា "អន្តរាគមន៍ដោយត្រង់ៗ" របស់លោកនាយករដ្ឋមន្ត្រី Benjamin Netanyahu និងការរិះគន់របស់លោកប្រឆាំងនឹងការសម្រេចចិត្តរបស់អូស្ត្រាលីក្នុងការទទួលស្គាល់រដ្ឋប៉ាឡេស្ទីន អាចបង្កឱ្យមានការឆ្លើយតបរបស់អូស្ត្រាលី។



ប្រទេសអូស្ត្រាលីកាលពីថ្ងៃអង្គារបាននិយាយថា អ៊ីរ៉ង់បានព្យាយាមចូលរួមពាក់ព័ន្ធក្នុងការវាយប្រហារកាលពីឆ្នាំមុនលើភោជនីយដ្ឋានរបស់ជនជាតិជ្វីហ្វ នៅទីក្រុងស៊ីដនី និងវិហារសាសនាជ្វីហ្វ ក្នុងទីក្រុងមែលប៊ន។ការបញ្ជារបស់ទីក្រុងកង់បេរ៉ា ឱ្យឯកអគ្គរដ្ឋទូតអ៊ីរ៉ង់ចាកចេញក្នុងរយៈពេលប្រាំពីរថ្ងៃគឺជាការបណ្តេញចេញជាលើកដំបូងចាប់តាំងពីសង្គ្រាមលោកលើកទីពីរ។

អ៊ីរ៉ង់បានបដិសេធម្តងហើយម្តងទៀតចំពោះការចោទប្រកាន់បែបនេះ ដែលខ្លួននិយាយថាជាផ្នែកនៃយុទ្ធនាការប្រឆាំងនឹងខ្លួន ពីសំណាក់ប្រទេសមហាអំណាចលោកខាងលិចទៅវិញទេ៕