នគរបាលនៅក្នុងប្រទេសហៃទី បានប្រកាសកាលពីថ្ងៃអង្គារ (២៦ សីហា) ថា ពួកគេដណ្ដើមបាននូវការគ្រប់គ្រងឡើងវិញលើមជ្ឈមណ្ឌលទូរគមនាគមន៍ដ៏សំខាន់មួយ ដែលក្រុមជនអន្ធពាលប្រដាប់អាវុធបានឡោមព័ទ្ធយកកាលពីសប្តាហ៍មុន ដែលបានធ្វើឱ្យរំខានដល់ចរាចរណ៍ផ្លូវអាកាស និងបណ្ដាញតភ្ជាប់អ៊ីធឺណិតរយៈពេលខ្លី។

ការកាន់កាប់ឡើងវិញនេះ គឺជាជោគជ័យដ៏កម្រសម្រាប់អាជ្ញាធរហៃទី និងបេសកកម្មគាំទ្រដោយអង្គការសហប្រជាជាតិ ដឹកនាំដោយនគរបាលកេនយ៉ា ដែលបានជួបការលំបាកក្នុងការរុញច្រានក្រុមជនអន្ធពាលដ៏មានឥទ្ធិពល មិនឱ្យគ្រប់គ្រងពេញលេញលើរដ្ឋធានីព័រអូប្រាំង។

លោក Michel-Ange Louis Jeune អ្នកនាំពាក្យនគរបាលជាតិហៃទី បានឱ្យដឹងថា «ប្រតិបត្តិការរបស់នគរបាលនៅតំបន់ Téléco ក្នុងសហគមន៍សន្តិភាពនៃទីក្រុង Kenscoff បានចាប់ផ្តើមនៅមុនថ្ងៃរះកាលពីថ្ងៃចន្ទសប្ដាហ៍នេះ ហើយមានរយៈពេលប្រហែលពីរម៉ោង»។ លោក Jeune មិនទទួលសំណួរក្នុងអំឡុងពេលសន្និសីទព័ត៌មាននោះទេ ហើយក៏មិនបញ្ជាក់ដែរថា តើមានមនុស្សប៉ុន្មាននាក់ដែរត្រូវសម្លាប់ក្នុងអំឡុងពេលប្រតិបត្តិការនោះ។

កាលពីសប្តាហ៍មុន ក្រុមជនអន្ធពាលអះអាងថាខ្លួនដណ្ដើមបានតំបន់ Téléco ដោយទុកពេលឱ្យរដ្ឋាភិបាល មិនដល់មួយសប្តាហ៍ទេដើម្បីចាប់ផ្តើមការចរចា ប៉ុន្តែមិននិយាយពីការទាមទាររបស់ខ្លួនឡើយ។ សកម្មភាពនេះត្រូវបានស្តីបន្ទោសលើក្រុមប្រដាប់អាវុធ Viv Ansanm ជាសហព័ន្ធក្រុមជនអន្ធពាលដ៏មានឥទ្ធិពល ដែលបានវាយប្រហារលើហេដ្ឋារចនាសម្ព័ន្ធសំខាន់ៗរបស់រដ្ឋាភិបាលកាលពីឆ្នាំមុន ហើយត្រូវសហរដ្ឋអាមេរិក ចាត់តាំងថាជាអង្គការភេរវករបរទេស កាលពីដើមឆ្នាំនេះ៕